«Հրապարակ»  թերթը գրում է․ 

ԱՄՆ ՀԱԵ Արեւմտյան թեմի առաջնորդանիստ Սրբոց Ղեւոնդյանց եկեղեցում երեկ կայացած պատարագի ժամանակ, ըստ կարգի, հիշատակվել է Վեհափառ հայրապետի անունը։ Սա ուշագրավ է նրանով, որ թեմի առաջնորդ Տ․ Հովնան արք․ Տերտերյանը 10 ուխտադրուժ հոգեւորականներից է, որոնք դուրս են եկել Վեհափառի դեմ։ 

Սա նշանակում է, որ որոշ հոգեւորականներ կա՛մ պատանդ են Նիկոլ Փաշինյանի ձեռքում, իսկ նրա աչքից հեռու ընդունում են Հայոց հովվապետի առաջնորդությունը եւ ըստ կարգի պատարագներ անում, կա՛մ իրենց ենթակայությամբ գործող եկեղեցիներն ու քահանաներն այլեւս ըմբոստներին չեն ենթարկվում։

«Ժողովուրդ» օրաթերթը գրում է.

«Երեւանի ավագանու նախկին անդամ Էդգար Զաքարյանը, շատ կարճ ժամանակ լինելով ավագանու անդամ, հասցրել է մասնակցել պետական գնումներին։ Զաքարյանը գրեթե 1 տարի է, ինչ ստանձնել է Էկոնոմիկայի նախարարի տեղակալի պաշտոնը։

Փոխնախարարը 2022-2023 թվականներին եղել է Երեւան քաղաքի «Իմ քայլը» դաշինքի ավագանու անդամ։

2024 թվականի նոյեմբերին ստանձնել է Էկոնոմիկայի նախարարի տեղակալի պաշտոնը։ Դրանից առաջ եղել է «Զաքարյան Քոնսթրաքշն Սոլուշնս» ընկերությունների հիմնադիր եւ գլխավոր տնօրեն։ «Ժողովուրդ» օրաթերթը տեղեկացավ, որ ՓԲԸ-ն հիմնադրվել է 2019-ին եւ զբաղվում է շինարարությամբ, պրոյեկտ մենեջմենթով, էքստերիերի եւ ինտերիերի դիզայնով։

Ուսումնասիրելով պաշտոնատար անձի տարեկան հայտարարագիրը՝ «Ժողովուրդ» օրաթերթը նկատել է, որ հաշվետու տարվա եկամուտները կազմում են 8 մլն 580 հազար դրամ, որից 2 մլն 367 հազար դրամն աշխատանքի վարձատրություն է Էկոնոմիկայի նախարարությունից։

Փոխնախարարը աշխատանքի վարձատրություն է ստացել նաեւ «Զաքարյան Քոնսթրաքշն Սոլուշնս» ընկերությունից 4 մլն 689 հազար դրամ։ Նույն ընկերությունից Զաքարյանը ստացել է նաեւ 900 հազար դրամ՝ վարձակալության դիմաց։

Է. Զաքարյանը աշխատանքի վարձատրություն է ստացել նաեւ «Հեզ ընդ Նեզ» ՍՊԸ-ից 623 հազար դրամ։ Այս ընկերությունը հիմնադրվել է 2018-ին եւ գերմանական s.Oliver հագուստի բրենդի ֆրանչայզերն է Հայաստանում։

«Ժողովուրդ» օրաթերթը պարզել է, որ Երեւանի քաղաքապետարանը գնումներ է կատարել ՔՊ-ական ավագանու անդամի ընկերությունից։Էդգար Զաքարյանը Երեւան քաղաքի ավագանու անդամ դարձել է, ըստ հայտարարագրի 24․03․2022-ին: «Զաքարյան Քոնսթրաքշն Սոլուշնս» ՓԲԸ-ն հիմնադրվել է 2019 թվականին։ Իրավական անձանց պետական ռեգիստրի համաձայն՝ ընկերության 44.78 %-ը պատկանում է Էդգար Զաքարյանին, իսկ 22.39 %-ը՝ Գեւորգ Զաքարյանին։

Համաձայն պետական գնումների armeps.am հարթակի տվյալների՝ «Զաքարյան Քոնսթրաքշն Սոլուշնս» ՓԲԸ-ի հետ 2022 թվականից պայմանագրեր են կնքել «Վ. Բրյուսովի անվան պետական համալսարան» հիմնադրամը, «Հայաստանի ազգային պոլիտեխնիկական համալսարան» հիմնադրամը եւ Երեւանի քաղաքապետարանը։

«Վ. Բրյուսովի անվան պետական համալսարան» հիմնադրամի հետ «շինարարական աշխատանքների» համար կնքվել է 3 մլն 964 հազար դրամ արժեքով պայմանագիր։ «Հայաստանի ազգային պոլիտեխնիկական համալսարան» հիմնադրամի հետ կնքվել է 8 մլն 813 հազար դրամ արժեքով պայմանագիր՝ «կառույցների կառուցման աշխատանքներ «Տերյան 105 հասցեում պտտադռնակի ծածկի եւ անցակետերի իրականացում» ծառայության համար։

Իսկ, ահա, 13․06․2022-ից մինչեւ 05․06․2023-ը կնքվել է 5 պայմանագիր Երեւանի քաղաքապետարանի հետ.

1․ Երեւան քաղաքի Մալաթիա-Սեբաստիա վարչական շրջանի Անդրանիկի 143 շենքի բակի հիմնանորոգման աշխատանքներ – 5 մլն 969 հազար 356 դրամ,

2․ Երեւան քաղաքի Էրեբունի վարչական շրջանի թեքահարթակների կառուցման աշխատանքներ – 1 մլն 134 հազար 430 դրամ,

3․ հենապատերի վերանորոգում – 14 մլն 319 հազար 291 դրամ,

4․ Մալաթիա-Սեբաստիա վարչական շրջանի՝ «սոցիալական հատուկ արտոնություններ» ծրագրի շրջանակներում ընդհանուր շինարարական աշխատանքներ-6 մլն 176 հազար 520 դրամ,

5․ Մալաթիա-Սեբաստիա վարչական շրջանի Սվաճյան փող․ հ․52 շենքին հարող տարածքի վերակառուցման աշխատանքներ- 3 մլն 921 հազար 600 դրամ։

Պայմանագրերի ընդհանուր գումարը կազմել է 31 մլն 521 հազար դրամ։

Էդգար Զաքարյանը Երեւան քաղաքի ավագանու անդամի իր պաշտոնավարումը դադարեցրել է 10․10․2023-ին։

Զաքարյանը 2018 թվականից «Քաղաքացիական պայմանագիր» կուսակցության անդամ է, հանդիսանում է ՔՊԿ Արաբկիր Տարածքային կազմակերպության խորհրդի նախագահ։

Ըստ Զաքարյանի կենսագրության՝ նա 2024 թվականից դադարեցրել է «Զաքարյան Քոնսթրաքշն Սոլուշնս» ՓԲԸ Տնօրենների խորհրդի նախագահի, տնօրենի եւ «Հեզ ընդ Նեզ» ՍՊԸ (“s.Oliver Group”-ի հայաստանյան գործընկեր) տնօրենի պաշտոնը։

«Ժողովուրդ» օրաթերթի հարցին, թե արդյոք այստեղ շահերի բախման կամ կոռուպցիոն ռիսկ չկա, Զաքարյանը բովանդակալից նշեց. «Նախ, ընկերությունը հիմնվել է 2019 թվականին, իսկ քաղաքապետարանի մրցույթներին մատնակցել է եւ որոշ դեպքերում պայմանագրեր կնքել 2020 թվականից։

Փաստեմ նաեւ, որ օրենքով անթույլատրելի որեւէ գործողություն չի արվել իմ եւ այն ընկերության կողմից, որի տնօրենը ժամանակին հանդիսացել եմ ես։
Քանի որ Երեւանի ավագանին քաղաքական մարմին է եւ որեւէ գործառույթ չունի Երեւանի գործադիր աշխատանքներում ընդգրկված մասնագիտական օղակների հետ, նրանք Ավագանու անդամներին ենթակա չեն։ Բացի դրանից, «Զաքարյան քոնսթրաքշն սոլուշնս» ՓԲԸ-ն մասնակցել է բացառապես էլեկտրոնային տարբերակով՝ ԱՐՄԷՓՍ հարթակով, որի ամփոփումը կատարվում է հայտերը բացելուց հետո՝ օրենքի ուժով։ Նախկինում իմ կողմից ղեկավարած այս ընկերությունը այդ ժամանակահատվածում մասնակցել է բազմաթիվ մրցույթների, բայց հաղթել է տարվա մեջ 2-3 մրցույթում միայն, բավականին փոքրիկ գներով: Չենք ունեցել ոչ մի «մեկ անձից» գնման օրինակ, եւ մասնակցել ենք բացառապես էլեկտրոնային հարթակով եւ մասնակցածների մեծ մասում հաղթող չենք ճանաչվել։

Ասեմ ավելին՝ 1-2 պայմանագրերում ուշացումներ ենք ունեցել, ինչի արդյունքում տուգանվել ենք ընդհանուր մոտ 800 հազար դրամով։

Այս ամենից հետո էլ 2023-ին մեր ընկերության կողմից որպես բարեգործություն իրականացրել ենք Երեւանի թիվ 144 դպրոցի 2 դասարանների վերանորոգում՝ մոտ 2 մլն դրամի ներդրումով, մինչդեռ բոլոր տարիների՝ քաղաքապետարանի հետ գործարքներից ստացված շահույթը անգամ 1 մլն դրամ չէր կազմում, քանի որ պայմանագրերը շատ փոքրիկ էին։

Այսքանից կարծում եմ պարզ է դառնում, որ այստեղ որեւէ կոռուպցիոն ռիսկ կամ անձնական միջամտում չի կարող լինել, հակառակ դեպքում վերոշարադրյալ պատկերն ուղղակի չէր լինի»,- «Ժողովուրդ» օրաթերթի հետ զրույցում ասաց Զաքարյանը։

Ստացվում է, որ Էդգար Զաքարյանը 2022 թվականի մարտից դարձել է Երեւանի ավագանու ՔՊ-ական անդամ, ապա քաղաքապետարանը սկսել է վերջինիս հիմնադրած ընկերության հետ կնքել պայմանագրեր հունիսից, ապա 2023 թվականի հոկտեմբերից դադարեցրել է ավագանու անդամ լինելը։ 2023 թվականից երեւանի քաղաքապետարանը դադարել է նաեւ ընկերության հետ պայմանագրեր կնքելը։ «Ժողովուրդ» օրաթերթը տեղեկացավ, որ պաշտոնավարման ընթացքում Էդգար Զաքարյանի հիմնադրած ընկերության հետ քաղաքապետարանը կնքել է 5 պայմանագիր»։ 

«Փաստ» օրաթերթը գրում է.

Նոյեմբերի 30-ին Սուրբ Սարգիս եկեղեցում մատուցված Պատարագի ընթացքում իշխող ուժի քարոզչական մեքենան փորձեց կիրառել քաղաքական աճպարարական հնարք՝ Փաշինյանի ավտոշարասյան մեքենաների վրա հանկարծ հայտնված աղավնու միջոցով։ Դեռ պատարագը չավարտված՝ քպամերձ հարթակներն սկսեցին կայծակնային արագությամբ տարածել այդ լուսանկարները՝ ներկայացնելով դրանք որպես իբր «Աստծո նշան»։ Այնինչ, շատերը նկատեցին, թե նման «խաղաղության աղավնին» ինչպիսի նշան կարող էր լինել հենց այն ավտոշարասյան պայմաններում, երբ այդ մեքենաներից մեկը մի քանի տարի առաջ մահացու վրաերթի էր ենթարկել 29-ամյա հղի Սոնա Մնացականյանին։

Ի դեպ, այս տեխնոլոգիան, որից օգտվել են իշխանության խորհրդատուները, նորություն չէ։ Այն թուրքական քարոզչամեքենայի դասական հնարք է, որը վերջին տասնամյակներում բազմիցս կիրառվել է Թուրքիայում՝ իշխանության քաղաքական օրակարգը «սրբացնելու» և առաջնորդին «Աստծո ընտրյալ» կերպարով ներկայացնելու նպատակով։ Օրինակ՝ 2015 թ. օգոստոսի 16-ին Ռիզեում մզկիթի բացման արարողության ժամանակ Էրդողանի գլխին «զարմանալի հանգամանքներում» հայտնված թռչունը թուրքական իշխանամերձ մամուլը նույն պահին ներկայացրեց որպես «Աստծո նշան»։ Այդ ժամանակ Էրդողանը գտնվում էր իր քաղաքական կենսագրության ամենացածր վարկանիշի փուլում, իսկ ընդդիմության ու հասարակական գործիչների դեմ բռնաճնշումները հասել էին գագաթնակետին։ «Աղավնու հրաշքը» մատուցվեց որպես «վերից ուղերձ», ինչը հանրային ընկալման վրա իրական ազդեցություն ունեցավ։

Հենց այդ փորձված մեխանիզմն էլ, ըստ աղբյուրների, որոշել են կրկնել նաև Հայաստանում՝ այս անգամ Փաշինյանի նախաձեռնած հակաեկեղեցական արշավի շրջանակում։ Այսպիսով, «խաղաղության աղավնու» քաղաքական շահարկումը ոչ թե հայկական իրականությունից բխող երևույթ է, այլ թուրքական քաղտեխնոլոգիական մշակույթի ներմուծում՝ հստակ քաղաքական նպատակներով, որով փորձ է արվել հոգեբանական մանիպուլ յացիայի միջոցով կոծկել Եկեղեցու դեմ իրականացվող ճնշումները և իշխանության առաջնորդին ներկայացնել «աստվածային նշաններով օժտված» կերպարով։ Այսինքն, անգամ սեփական լոգոն թուրքական կուսակցությունից փոխառած ՔՊ-ն այժմ էլ փոխառել է թուրք քաղտեխնոլոգների «խաղաղության աղավնի» օպերացիան՝ որպես հոգեբանական ազդեցության միջոց Հայաստանում. հասկանալի է՝ նպատակը Եկեղեցու դեմ աճող ճնշումների ֆոնին հասարակական նեգատիվը մեղմելը և Փաշինյանին «վերից եկող ընտրության» խորհրդանիշով ներկայացնելը։