«Փաստ» օրաթերթը գրում է.
2025 թվականի առաջին կիսամյակում Հայաստանի 1000 խոշոր հարկ վճարողների ցանկը, կարելի է ասել, բավականին տխուր պատկեր է ի ցույց դնում: Կան զգալի անակնկալներ, իսկ այդ ամենն, ընդհանուր առմամբ, պատկերում է Հայաստանի տնտեսության առկա անմխիթար վիճակն ու կառավարության վերջին տարիների գործունեության ծանր հետևանքները:
Նախ՝ նշենք, որ մեծ թիվ են կազմում ներկրողները, վերաարտահանողներն ու բանկերը: Ավելին, դրանցից մեկն այս անգամ ցուցակի առաջատար է դարձել: Խոսքը «Մոբայլ սենթրի» մասին է, որն առաջին կիսամյակում վճարել է մոտ 33 մլրդ դրամ հարկ: Համեմատության համար նշենք, որ չնայած զգալի թիվ են կազմում ՏՏ ընկերությունները, ընդհանուր առմամբ՝ 76-ը 1000 խոշոր հարկատուների ցանկում են, սակայն նրանք բոլորը միասին պետական բյուջե են վճարել շուրջ 54 միլիարդ դրամ։
Ոչ պակաս տպավորիչ է առաջին հիսնյակի ընդհանուր պատկերը: Բացի ներմուծում և հատկապես վերաարտահանում իրականացնող ընկերություններից, լավագույն հիսուն հարկ վճարողների ցանկում են հանքարդյունաբերության 4 ընկերություն՝ ոլորտի անվերապահ առաջատար և Հայաստանի տնտեսության հիմնական շոգեքարշներից մեկը համարվող Զանգեզուրի պղնձամոլիբդենային կոմբինատի գլխավորությամբ, 10 բանկ (Արդշինբանկ, Ամերիաբանկ, Ակբա, Ինեկո, Այդի, Յունիբանկ, Էվոկա, Արարատ, Հայէկոնոմբանկ), կապի երեք օպերատոր (Վիվա Արմենիա, Տելեկոմ Արմենիա, Յուքոմ), ինչպես նաև Գազպրոմը, ՀԷՑ-ը և Վեոլիա ջուրը:
Չնայած, ընդհանուր առմամբ, արտադրության ծավալները երկրում որոշակիորեն կրճատվել են հունվար-հունիսին, այդուամենայնիվ, կան ընկերություններ, որոնք իրենց դիրքերը պահպանել են լավագույն հարկատուների ցանկում: Նրանց թիվը առաջին հիսնյակում 8-ն է՝ Գրանդ տոբակո, Մասիս տաբակ, Սիգարոն, Ջերմուկ, Կոկա-Կոլա, Գրանդ քենդի, Աթենք:
«Ժողովուրդ» օրաթերթը գրում է.
««Ժողովուրդ» օրաթերթի բացառիկ տեղեկությունների համաձայն՝ Էջմիածնի նախկին քաղաքապետ Դիանա Գասպարյանի ամուսնուն օրերս կանչել են ՀՀ քննչական կոմիտե՝ վկայի կարգավիճակով հարցաքննության:
Իսկ ինչ են փորձել պարզել քննիչները: Բանն այն է, որ նախկին քաղաքապետի ամուսնու գազալցակայանում մարտի 22-ին սպանություն էր կատարվել, եւ տեսանկարահանող սարքի հիշողության կրիչը անհետացել էր։ Իրավապահները փորձել էին հասկանալ՝ որտեղ է հիշողության կրիչը, գազալցակայանի աշխատակիցները նրանց բացատրել էին, թե տեսանկարահանող սարքը հիշողության կրիչ չի էլ ունեցել։ Իրավապահները կասկածներ ունեն, որ հիշողության կրիչը միտումնավոր ոչնչացվել է:
Այժմ Գասպարյանի ամուսնուն կանչել են ու վկայի կարգավիճակով հարցաքննել, որպեսզի պարզեն նրա առնչությունը կատարվածի վերաբերյալ:
Սպանությունից անցել է 4 ամիս, եւ ենթադրյալ սպանություն կատարող անձին՝ Արմավիրի մարզում հայտնի «ՃԱՊ» մականունով 33-ամյա Կարեն Բադալյանին իրավապահները դեռ փնտրում են:
Արդյունքում՝ այս դեպքերից 1,5 ամիս անց (կրակոցնեը տեղի էին ունեցել մարտի 22-ին, Էջմիածնի քաղաքապետի տան խուզարկությունը՝ մարտի 25-ին) Էջմիածնի քաղաքապետ Դիանա Գասպարյանը ստիպված եղավ հրաժարական տալ։ Հրաժարականից հետո արդեն Դիանա Գասպարյանը եւ նրա սկեսուրը հայտնվեցին մեղադրյալի աթոռին՝ Հակակոռուպցիոն կոմիտեում քննվող քրեական վարույթի շրջանակներում»։
«Փաստ» օրաթերթը գրում է.
Այս օրերին, սեզոնի հետ կապված, դարձյալ մեծ հոսք է նկատելի Հայաստան-Վրաստան սահմանային անցակետերում: Ըստ նախնական տեղեկությունների, այս տարի այդ հոսքը մի փոքր ավելի շատ է: Ծանրաբեռնվածության հիմնական բաժինն ընկնում է «Բագրատաշեն» անցման կետի վրա:
Հիմնական պատճառն այն է, որ նախ՝ «Բագրատաշեն» անցակետն ավելի մեծ է, ըստ այդմ՝ մեծ է նաև թողունակությունը, երկրորդ՝ «Բավրա» և հատկապես «Գոգավան» անցակետերի պարագայում վրացական կողմում ճանապարհների որոշակի հատված ոչ բարվոք վիճակում է, իսկ Թբիլիսի և Ռուսաստան մեկնողների համար «Բավրայի» պարագայում ավելանում է նաև այն հանգամանքը, որ ճանապարհն անհամեմատ երկարում է:
Օրերս սոցցանցերում կադրեր էին հայտնվել, թե ինչ կուտակումներ են անցակետերում: Սակայն մեր լրագրողներն արձանագրել են, որ այդ կուտակումները առավելապես վրացական անցակետերում են: Հանուն արդարության պետք է նշել, որ թե՛ «Բավրա», թե՛ «Գոգավան» և թե՛ հատկապես «Բագրատաշեն» անցման կետերի ԱԱԾ սահմանապահ զորքերի ծառայողները բավական բարձր մակարդակով են կազմակերպում աշխատանքները. նրանք սիրալիր են, պատրաստակամ, իրենց գործառույթներն իրականացնում են օպերատիվորեն, առանց արհեստական ձգձգումների, բայց և առանց «գլխառադ» անելու: Սակայն վրացական կողմում հատկապես այս տարի բավական շատ են ձգձգումները: Սրա արդյունքում, ինչպես մեզ հետ զրույցում նշում էին թե՛ մեկնողները, թե՛ վերադարձողները, այդ թվում՝ ոչ հայերը, վրացական կողմում բավական կուտակումներ են նկատվում, այնինչ հայկական կողմում առավելագույն սահուն է գործընթացը: