«Իրավունք» թերթը գրում է.

«Ասում են, թե ոչ մանդատավոր ՀՅԴ-ականների վերնախավում կուլիսային ակտիվ քննարկումներ են ծավալվել այն մասին, որ գուցե 2026 թվականի խորհրդարանական ընտրություններին առանձին մասնակցելը կուսակցության համար ավելի շահավետ լինի։

Մեր աղբյուրները պնդում են, որ կուսակցությունում միանշանակ դրական չեն գնահատել այն հայտարարությունը, որը վերջերս արել է ԱԺ «Հայաստան» խմբակցության պատգամավոր Լևոն Քոչարյանը՝ նշելով, թե ՀՀ երկրորդ նախագահ Ռոբերտ Քոչարյանի առաջնորդությամբ իրենց դաշինքը պատրաստվում է մասնակցել առաջիկա ընտրություններին։

Անգամ ասում են, թե դաշնակցական որոշ շրջանակներում վստահ են, որ առանձին գնալով ընտրությունների` կարող են ոչ միայն սեփական դեմքը պահել, այլեւ ավելի շատ ձայն հավաքել՝ չասոցացվելով Քոչարյան ընտանիքի անվան շուրջ ձեւավորված դաշինքի հետ»։

«Հրապարակ» օրաթերթը գրում է․

Հայաստանի խորհրդարանական ընդդիմությունը Արցախի քաղաքական իշխանության հետ համատեղ հանրահավաք է կազմակերպում սեպտեմբերի 2-ին` Արցախի անկախության հռչակման օրը։ Նախնական պլանով՝ հանրահավաքը կանցկացվի Ազատության հրապարակում։

Այս հավաքով, բացի այն, որ ընդդիմությունը փորձելու է հակակշռել իշխանությանը՝ ցույց տալով, որ չի պատրաստվում փակել Արցախի էջը, այլեւ հանրությանն ուղերձ է հղելու առ այն, որ ազգային հարցերում համախմբված է, ինչը հնարավորություն է տալիս նաեւ մյուս բոլոր հարցերի հարթման ուղղությամբ քայլեր անել։ Հիշեցնենք, որ 1991 թ․ սեպտեմբերի 2-ին Արցախը հռչակեց իր անկախությունը Խորհրդային Միությունից: Այժմ Փաշինյանը բացահայտ ասում է՝ Արցախը հանձնել է, որ Հայաստանում խաղաղություն հաստատի, իսկ ովքեր համաձայն չեն, թող հեղափոխություն անեն։

«Ժողովուրդ» օրաթերթը գրում է.

«Ուռուցքաբանության ազգային կենտրոնի նախկին տնօրեն Նարեկ Մանուկյանը, որը կարկառուն ՔՊ-ական Արսեն Թորոսյանի ընկերն է, փորձում է «Մենք»-ի գաղափարով քաղաքականություն մտնել: Նա վստահեցնում է, որ Նիկոլ Փաշինյանի հետ չէ եւ չի լինի, բայց իր «Մենք»-ի մեջ վստահաբար ներկա է Արսեն Թորոսյանը: Ի՞նչ քարոզ է անում նա:

«Ժողովուրդ» օրաթերթը տեղեկացավ, որ Նարեկ Մանուկյանը վերջերս 3-4 տասնյակ երիտասարդների հետ փակ հանդիպում է կազմակերպել, եւ քննադատելով Նիկոլ Փաշինյանին՝ հայտարարել է. «Ես ավելի շատ փորձ ունեմ, քան ձեր նշած անձնավորությունը, որի մասին նույնիսկ Իլհամ Ալիեւը ծաղրանքով ասել էր՝ մի կոլխոզ չի ղեկավարել… Իսկ ես 700 հոգանոց կոլեկտիվ եմ ղեկավարել 5-6 տարի, եւ ինչ նպատակ դրել եմ իմ առջեւ՝ կատարել եմ»: Հիշեցնենք, թե ով է այս նոր քաղաքական գործիչը, որը երիտասարդներին խոստանում է հերթական պայծառ ապագան: Երբ ՔՊ-ական Արսեն Թորոսյանի կողմից նշանակված մի քանի տնօրեններ մեկ ամսում հեռացան պաշտոններից, այդ թվում՝ «Գրիգոր Լուսավորիչ» ԲԿ-ի, Կախվածությունների ազգային կենտրոնի, Նուբարաշենի հոգեբուժարանի տնօրենները, այս տարվա ապրիլի 4-ին Նարեկ Մանուկյանն էլ ազատվեց Ուռուցքաբանական ազգային կենտրոնի ղեկավարի պաշտոնից:

Նախարար Անահիտ Ավանեսյանը այլեւս չէր ցանկանում նրա հետ աշխատել: Նեղացած Մանուկյանը նաեւ Երեւանի ավագանու անդամ էր ՔՊ խմբակցության կազմում. նա ավագանու անդամի մանդատն էլ վայր դրեց: Այո՛, սա նույն Նարեկ Մանուկյանն է, որը 2019 թվականի հոկտեմբերի 4-ին, իր աշխատասենյակում վիճաբանել, ապա հարվածել էր իր աշխատակից բժշկին եւ կոտրել նրա քիթը: Փաստորեն՝ ենթակայի քիթ կոտրելը եւս «Մենք»-ի գաղափար է»։