- Իսրայելը հասել է Իրանի դեմ ռազմական գործողության բոլոր նպատակներին՝ վերացնելով միջուկային և հրթիռային ոլորտներում սպառնալիքը, հայտարարել է Իսրայել վարչապետ Բենյամին Նեթանյահուի գրասենյակն ԱՄՆ նախագահ Դոնալդ Թրամփի կողմից հայտարարված հրադադարից հետո։

Հրադադարից առաջ Իսրայելի հարձակումների արդյունքում զոհվել է միջուկային գիտնական Մոհամմադ Ռեզա Սեդդիքը, հայտնել է Իսլամական հեղափոխության պահապանների կորպուսը: Իսրայելի հարձակումից հետո Իրանի Գիլան նահանգում զոհվել է 9 մարդ, իսկ 33-ը՝ վիրավորվել:

Իսրայելը հայտնել է երկրի հարավում գտնվող Բեեր Շեբա քաղաքի շենքի վրա Իրանի կողմից հրթիռային հարվածի հետևանքով 4 մահվան դեպքի մասին:

- Իսրայելցի պաշտոնյաներից մեկն ասել է, որ իր երկիրը կհետևի Թրամփի կողմից հայտարարված հրադադարին։ Հրադադարը կմնա ուժի մեջ, եթե երկու կողմերն էլ պահպանեն այն:

«Թրամփը հայտարարել է հրադադարի մասին: Եթե բոլոր կողմերը պահպանեն այն, այն կմնա», - Walla լրատվական կայքին ասել է պաշտոնյան:

- Իրանի արտաքին գործերի նախարար Աբբաս Արաղչին հաստատել է ԱՄՆ նախագահ Դոնալդ Թրամփի կողմից Իրանի և Իսրայելի ռեժիմի միջև հրադադարի վերաբերյալ արված հայտարարությունը։

«Մեր հզոր զինված ուժերի ռազմական գործողությունները՝ Իսրայելի ագրեսիան պատժելու նպատակով, շարունակվեցին մինչև վերջին պահը՝ առավոտյան ժամը 4-ը։ Իրանի ողջ ժողովրդի հետ շնորհակալություն եմ հայտնում մեր քաջարի զինված ուժերին, որոնք պատրաստ են պաշտպանել մեր սիրելի հայրենիքը մինչև իրենց արյան վերջին կաթիլն ու պատասխանեցին թշնամու ցանկացած հարձակման՝ մինչև վերջին պահը»,- գրել է Արաղչին X-ում։