Ռուսաստանի նախագահ Վլադիմիր Պուտինը հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ։
Ի թիվս այլնի՝ կայացել է մտքերի փոխանակում Ուկրաինայում ստեղծված իրավիճակի վերաբերյալ, այդ թվում՝ խաղաղ կարգավորման ամերիկյան առաջարկների համատեքստում, հայտնել է Կրեմլը։
Վլադիմիր Պուտինը նշել է, որ այդ առաջարկները, ՌԴ-ի կողմից վերանայված տարբերակով, համապատասխանում են Ալյասկայում կայացած ռուս-ամերիկյան գագաթնաժողովում քննարկումներին և, սկզբունքորեն, կարող են հիմք հանդիսանալ վերջնական խաղաղ կարգավորման համար։ Վերահաստատվել է Ռուսաստանի շահագրգռվածությունը ուկրաինական ճգնաժամի քաղաքական և դիվանագիտական կարգավորման հարցում։
Ռեջեփ Թայիփ Էրդողանը «հայտնել է բանակցային գործընթացին ամեն տեսակի աջակցություն ցուցաբերելու իր մտադրությունն ու պատրաստակամությունը շարունակել Ստամբուլի հարթակը հասանելի դարձնել այդ նպատակների համար»։ Պայմանավորվածություն է ձեռք բերվել ակտիվացնել ռուս-թուրքական շփումները ուկրաինական հարցի շուրջ տարբեր մակարդակներում։
Թուրքիայի նախագահը նաև կիսվել է Յոհաննեսբուրգում կայացած G20 գագաթնաժողովին իր այցի և մի շարք անդամ պետությունների ղեկավարների հետ հանդիպումների տպավորություններով։