Ասում էր՝ թալանը վերադարձնելու ենք, տանք ձեզ, ժողովուրդ։ Հիմա ամենամեծ թալանչիներն իրենք են։ Այդ մասին ԼուրջCast հաղորդման եթերում հայտարարել է ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը։

Նրա խոսքով՝ կոռուպցիան վխտում է Հայաստանում։

«Իրենց քաղաքական խոսույթից մեջբերում անեմ. ասում էին, քաղաքացին տուգանքի մատերիալ չի, հիմա քաղաքացին դարձել է 100 տոկոսանոց տուգանքի մատերիալ։ Ավելին, ամեն օր իշխանութունները մտածում են՝ ի՞նչ նոր օրենք ընդունեն, որ քաղաքացու կյանքը դժվարացնեն»,- նկատեց նա։

Արթուր Վանեցյանի դիտարկմամբ՝ Նիկոլ Փաշինյանի իշխանության մնալու գաղտնիքներից մեկն էլ եղել է այն, որ ինքը թվացյալ ազատություն է տվել բիզնես աշխարհին։ 

«Մարդիկ ասում էին՝ լավն է, վատն է, ինչ է, մեզ չեն կպնում, հարկային տեռոր չկա, ապրանքը բերում ես, մաքսազերծում է, մենաշնորհները չկան։ Բայց հիմա մենք ի՞նչ ենք տեսնում։ Իրենց հետ աֆիլացված մարդիկ բիզնեսը քաշել են իրենց տակ, մնացած տնտեսվարողները, որ ՔՊ աջակիցները չեն, էն հայտնի դրամահավաքներին չեն մասնակցում։ Իսկ եթե դրամահավաքի հրավերից հետո մի բիզնեսմեն չի գնում դրամահավաքի, իմանում ենք, որ հարկայինը մտավ, մի անհեթեթ ակտ գրեց։ 

Հիմա բիզնեսին էլ են սկսել նեղացնել, դրա հետ մեկտեղ ոչ մի տնտեսական աճ չունենք, տնտեսության մեջ մի լավ բան չունենք, ավելին, բյուջեի չկատարում ունենք։ Հիմա աֆերիստություն են արել, բյուջեն պետք է ամեն ամիս պլանավորված հավաքվի, հիմա իրենք առաջին ամիսներին փոքր գումարներ են թողել, որ վիճակագրություն ցույց տան՝ իբր 100 տոկոսով հավաքում են, բայց  6-7-րդ ամիսը հենց լրանա,  տարվա վերջ մենք կտեսնենք, որ բյուջեն չի կատարվում»,- նշեց Արթուր Վանեցյանը։

ԱԱԾ նախկին տնօրենը հենց եթերում կանխատեսում արեց, որ մոտավորապես 250 մլրդ դրամից  ավելի գումար բյուջեն չի լրացվելու, դրա բացը պետք է լրացնեն վարկային նոր միջոցներ ներգրավելով։ 

«Վարկային միջոցներ ներգրավեն, արտաքին պարտքն ավելանալու է։ Այսօր արդեն ունենք ահռելի գումար՝ 12 մլրդ դոլարից ավելի պարտք, այդ բեռը պետության, իմ, ձեր, բոլորի  վրա է»,- ամփոփեց խոսքը «Հայրենիք» կուսակցության նախագահ Արթուր Վանեցյանը։