Նախաքննական գաղտնիք է, շատ բան ասել չեմ կարող, բայց ինձ առաջադրված մեղադրանքն ապօրինի է: Բնականաբար այն չեմ ընդունում, մեղադրանքում ոչ մի կետ իրականությանը չի համապատասխանում։ Այս մասին այսօր MediaHub.am-ի հետ զրույցում ասաց Երևանի նախկին փոխքաղաքապետ Վահե Նիկոյանը՝ խոսելով իրեն առաջադրված մեղադրանքի և իր ձերբակալման մասին։

Հիշեցնենք, որ օրեր առաջ ՀՀ հակակոռուպցիոն կոմիտեն հայտնել էր, որ Վահե Նիկոյանը ձերբակալվել է։ Ըստ հաղորդագրության՝ բավարար փաստեր են ձեռք բերվել այն մասին, որ Նիկոյանն իր պաշտոնավարման տարիներին չարաշահել է պաշտոնեական դիրքը։ Արդյունքում մայրաքաղաքում տարիներ շարունակ փաստացի չկատարված աղբահանության աշխատանքների և չմատուցված սանիտարական մաքրման ծառայությունների համար «Սանիթեք» ընկերությանը, ինչպես նաև դրա հետ փոխկապակցված ընկերություններին անհիմն վճարվել է ավելի քան 3 մլրդ դրամ։ 

Կոմիտեից հայտնում են նաև, որ Վահե Նիկոյանը, պաշտոնեական դիրքն օգտագործելով, չի կատարել ծառայողական պարտականությունները և հսկողություն չի իրականացրել նշված ընկերությունների կողմից աշխատանքների իրականացման նկատմամբ: 

«Այս փուլում ավելին ասելն իմ դեմ կգործի, այնպես որ կխուսափեմ այլ հարցերին պատասխանել։ Ժամանակը հրանավորություն կտա, որ բոլորը հասկանան, թե ինչ է կատարվում»,-ասաց նա։ 

Դիտարկմանը, թե այդ շրջանում «Սանիթեքի» վատ աշխատանքի մասին բոլորն էին խոսում, վերջինս արձագանքեց՝ ինքը «Սանիթեքի» աշխատանքի հետ կապ չի ունեցել։ 

«Հետևաբար, ինձ այդ դաշտ մի մտցրեք»,- հավելեց նա։

Լիաննա Թորոսյան