Սկանդալը, որը ծագել է Կոնգրեսի մի խումբ դեմոկրատների կողմից նախագահ Ջո Բայդենին ուղղված նամակի շուրջ, որը կոչ էր անում Ուկրաինայում պատերազմը դադարեցնելու համար բանակցություններ սկսել Ռուսաստանի հետ, ստիպել է նրանց հետ կանչել այն:

«Կոնգրեսի առաջադեմ խմբակցությունը սույնով հետ է կանչում Ուկրաինայի վերաբերյալ Սպիտակ տուն ուղարկված իր վերջին նամակը»,- ասել է խմբակցության նախագահ, Ներկայացուցիչների պալատի անդամ Պրամիլա Ջայապալը:

Ինչպես ավելի վաղ հաղորդվել էր, ԱՄՆ 30 դեմոկրատ կոնգրեսականներ նամակ են ուղարկել նախագահ Ջո Բայդենին՝ խնդրելով ուղիղ բանակցություններ սկսել Ռուսաստանի հետ՝ Ուկրաինայի պատերազմի դիվանագիտական կարգավորման հասնելու համար։

«Ըստ գնահատականների՝ միջուկային զենքի կիրառման ռիսկն այժմ ավելի մեծ է, քան երբեւէ սառը պատերազմի ժամանակներից: Հաշվի առնելով միջուկային էսկալացիայի աղետալի հնարավորությունները եւ սխալ հաշվարկները, որոնք մեծանում են, որքան երկարում է այս պատերազմը։ Մենք համաձայն ենք ուղղակի ռազմական հակամարտությունից խուսափելու ձեր նպատակի հետ՝ որպես ազգային անվտանգության առաջնահերթություն:

Հաշվի առնելով այն ավերածությունները, որոնք այս պատերազմը ստեղծել է Ուկրաինայի եւ աշխարհի համար, ինչպես նաեւ աղետալի էսկալացիայի վտանգը, մենք նաեւ կարծում ենք, որ երկարատեւ հակամարտությունից խուսափելը բխում է Ուկրաինայի, Միացյալ Նահանգների եւ աշխարհի շահերից։ Այդ իսկ պատճառով մենք ձեզ կոչ ենք անում ռազմական եւ տնտեսական աջակցությունը, որը Միացյալ Նահանգները տրամադրել է Ուկրաինային, համադրել ակտիվ դիվանագիտական ճնշման հետ՝ կրկնապատկելով հրադադարի իրատեսական շրջանակներ գտնելու ջանքերը»,- ասվում է նամակում»,- նշվում էր նամակում։

Նամակի հրապարակումից մի քանի ժամ անց խումբը հայտարարություն էր ուղարկել, որը նպատակ ուներ պարզաբանել սկզբնական հաղորդագրությունը։

«Նախագահ Բայդենին ուղղված այսօրվա նամակում մենք կոչ ենք արել վարչակազմին շարունակել ռազմական եւ տնտեսական աջակցությունը ուկրաինացիներին՝ միաժամանակ դիվանագիտական աջակցություն ցուցաբերելով Ուկրաինային, որպեսզի երաշխավորենք, որ մենք օգտակար գործընկերներ ենք Ուկրաինայի ժողովրդի համար ընդունելի լուծման հասնելու ջանքերում:

Մենք՝ որպես դեմոկրատներ, միասնական ենք մեր անկասկած հանձնառության մեջ՝ իր ժողովրդավարության եւ ազատության համար պայքարում Ուկրաինային աջակցելու հարցում՝ ռուսական անօրինական եւ աղաղակող ներխուժման պայմաններում, եւ նամակում այդ աջակցությունը փոխելու ոչ մի կոչ չկա»,- բացատրել էին նրանք:

«Դիվանագիտությունը կարեւոր գործիք է, որը կարող է կյանքեր փրկել, բայց դա գործիքներից մեկն է։ Ինչպես մենք նաեւ հստակ նշել ենք մեր նամակում եւ կշարունակենք պարզաբանել։ Մենք սատարում ենք նախագահ Բայդենի եւ նրա վարչակազմի ջանքերին՝ ոչինչ չանել Ուկրաինայի հարցում առանց Ուկրաինայի»:

Այդուհանդերձ, նամակը ստորագրած դեմոկրատները բուռն բացասական արձագանքի են արժանացել երկու կուսակցությունների կողմից, որոնք հայտարարել են, որ նամակը «խափարում է Մոսկվայից տարածքները հետ վերցնելու Ուկրաինայի ջանքերը եւ անտեսում է Բայդենի վարչակազմի ռազմավարությունը՝ ստիպելու Ռուսաստանին դուրս բերել զորքերը»:

«Ինչպե՞ս ավարտել պատերազմը։ Հաղթել արագ։ Ինչպե՞ս արագ հաղթել: Ուկրաինային զենք տալ, որ հաղթի Ռուսաստանին»,- Twitter-ում գրել է կոնգրեսական Ռուբեն Գալյեգոն:

Կոնգրեսի Առաջադիմական խմբի անդամները, որոնք ստորագրել են նամակը, փորձել են բացատրել: Ստորագրողներից կոնգրեսական Մարկ Փոկանը թվիթերյան իր էջում գրել է, որ նամակը գրվել է հուլիսին, եւ «ես գաղափար չունեմ, թե ինչու է այն ուղարկվել հիմա: Անհաջող ժամանակ»։

Ներկայացուցիչների պալատի աղբյուրները The Hill-ին հայտնել են, որ նամակը տարածվել է այս ամառվա սկզբին, եւ դրա հրապարակումն ընտրություններին այդքան մոտ, անհասկանալի է: «Նրանք սպասել են մինչեւ մոտ 30 հոգի հավաքվի եւ հրապարակել են»,- ասել է աղբյուրներից մեկը:

Անդամները փորձել են պարզել նամակի հետ կապված հանգամանքները, նախքան Պրամիլա Ջայապալը ի վերջո հետ է կանչել այն երեքշաբթի կեսօրին՝ ասելով, որ ճիշտ ժամանակ չի ընտրվել:

Newsweek-ը սկանդալից հետո «Ինչպես են առաջադեմ դեմոկրատները Պուտինին ձեռնտու խաղում» վերնագրով հոդված է հրապարակել: Ներկայացուցիչների պալատի առաջադեմ դեմոկրատների նամակը, որը նախագահ Ջո Բայդենին կոչ էր անում ուղղակիորեն աշխատել Կրեմլի հետ՝ Ուկրաինայում հրադադարի հասնելու համար, տարաձայնություններ է սերմանել կուսակցության ներսում եւ ձեռնտու է Վլադիմիր Պուտինին»,- ասվում է հոդվածում:

«Այս խնդրանքը իսկապես ցույց է տալիս տարաձայնությունները»,- Newsweek-ին ասել է Լոնդոնի Թագավորական քոլեջի պաշտպանական հետազոտությունների բաժնից Մարինա Միրոնը:

«Տարաձայնություններ ի սկզբանե եղել են, հատկապես եվրոպացի առաջնորդների եւ Մեծ Բրիտանիայի ու ԱՄՆ-ի նրանց գործընկերների միջեւ, բայց այժմ մենք տեսնում ենք ներքին տարաձայնություններ ամենամեծ դոնոր երկրում»,- ասել է նա: «Եվ այդ տարաձայնությունները, հավանաբար, կօգտագործվեն ռուսական տեղեկատվական պատերազմի, ապատեղեկատվական արշավների եւ քարոզչության կողմից՝ երկու ճամբարների միջեւ սեպ խրելու եւ յուրաքանչյուր ճամբարի կողմնակիցներին դժգոհությունն առաջացնելու համար»: Միրոնը մտահոգված է, որ Ուկրաինային օգնության հարցում ԱՄՆ-ում ցանկացած տատանում, քանի որ երկիրը կրկին կենտրոնանում է ներքին գնաճի դեմ պայքարի վրա, կարող է ազդել եվրոպական քաղաքականություն մշակողների եւ նրանց որոշումների կայացման վրա, «որովհետեւ նրանք նույնպես ծանր հարված կստանան, եթե ԱՄՆ-ը կրճատի իր օգնությունը, իմանալով, որ նրանք այժմ գտնվում են եզրագծին եւ չեն կարող իրենց վրա վերցնել այդ բեռը»:

Ռեդինգի համալսարանի ռազմավարական հետազոտությունների եւ միջազգային հարաբերությունների դասախոս Քենթոն Ուայթը Newsweek-ին ասել է, որ նամակն ուղղակիորեն խաթարում է «ուկրաինական դիմադրությանն» աջակցելու Բայդենի հայտարարած նպատակը:

«Այս կարգի «կոչը» պատերազմին անմիջականորեն չմասնակցող որոշ երկրների կողմից կընկալվի որպես բաժանում այն երկրների ներսում, որոնք աջակցում են Ուկրաինային։ Չինաստանի նման երկրները նման իրադարձությունները կօգտագործեն քարոզչության համար»,- ասել է նա։

«Այժմ առաջադեմները ՉԵՆ ցանկանում Ուկրաինայի հետ խաղաղության պայմանագիր։ Այն բանից հետո, երբ երկուշաբթի օրը հրապարակվեց Ներկայացուցիչների պալատի Սպիտակ տանն ուղղված 30 դեմոկրատների նամակը, որով նախագահ Ջո Բայդենին հորդորում էին Ուկրաինային ռազմական օգնությունը համատեղել հակամարտության դիվանագիտական լուծման նոր ուղու հետ, նամակը հանկարծ հետ է կանչվել նամակը ստորագրողների զանգվածային բացասական արձագանքից հետո»,- գրում է 19fortyfive-ը։

«Չնայած հարցումները ցույց են տալիս, որ ամերիկացի ընտրողները կցանկանային, որ Սպիտակ տունը դիտարկեր Ուկրաինայի պատերազմը դադարեցնելու դիվանագիտական տարբերակները, դեմոկրատները կարծես թե կարծում են, որ նամակը կարող է խոչընդոտել միջանկյալ ընտրություններում Ներկայացուցիչների պալատի եւ Սենատի վերահսկողությունը պահպանելու իրենց ջանքերին… Ճշմարտությունն այն է, որ ամերիկացի ժողովուրդը ցանկանում է դիվանագիտական մոտեցում տեսնել ուկրաինական հակամարտության նկատմամբ, եւ Ուկրաինայում մարտավարական միջուկային զենքի կիրառմամբ գլոբալ հակամարտության շատ իրական հեռանկարով բանակցությունների կոչերը կարող են ամենաառաջադեմ դեմոկրատներին եւ ամենապոպուլիստական հանրապետականներին միավորելու միջոց լինել»,- նշում է հեղինակը։