«Մուրացան» համալսարանական հիվանդանոցի ընդունարանում  35-ամյա տղամարդու հարվածի հետևանքով բժշկուհին գլխացավեր, գլխապտտույտներ  ունի, դատաբժշկական փորձագետների մոտ է առավոտյան եղել, ուղարկել են նյարդաբանի մոտ, ենթադրում ենք, որ ուղեղի ցնցում է ստացել։ Այս մասին այսօր MediaHub.am-ի հետ զրույցում ասաց «Մուրացան» համալսարանական հիվանդանոցի բժշկուհի Կարինե Թադևոսյանի լիազոր ներկայացուցիչ Վահագն Ջիվանյանը։ 

«Հարվածը բավականին ուժեղ է եղել։ Տղամարդը դժգոհ է եղել բուժօգնությունից, վիճաբանություն է եղել, իմ ներկայացուցիչը միջամտել է, փորձել է կարգի հրավիրել, տղամարդն իրեն է հարվածել»,-ասաց նա։ 

Տղամարդը ձերբակալված է, տուժող կողմի հետ առերեսում է եղել։ 

«Բժշկուհին ցուցմունք տվեց, զննության մասնակցեցինք, տեսանյութն ուսումնասիրեցինք, նույն անձն էր, որը նաև մասնակցել է անվտանգության աշխատակցի հետ ծեծկռտուքին։ Հնարավոր է, որ նրան այսօր կալանքի ներկայացնեն»։ 

Ջիվանյանի փոխանցմամբ՝ առերես հարցաքննությունից առաջ տղամարդը ներողություն է խնդրել։ «Բժշկուհուն ասաց, որ զղջում է, երեխայի հետ կապված ծանր հոգեբանական վիճակում է եղել։ Սա կարևոր հանգամանք է, որ  անձը զղջում է իր արածի համար»։

Հիշեցնենք, որ ՀՀ քննչական կոմիտեի փոխանցմամբ՝ «Մուրացան» համալսարանական հիվանդանոցի ընդունարանում  35-ամյա տղամարդը   2022 թվականի նոյեմբերի 15-ին՝ ժամը 20:45-ի սահմաններում,  անհիմն վիճաբանել էր նույն հիվանդանոցի բժշկուհու հետ, որի ընթացքում բռունցքով հարվածել էր նրա դեմքին: Բացի այդ, հաջորդ օրը՝ ժամը 00:35-ի սահմաններում 35-ամյա տղամարդը, նշված հիվանդանոցի դիմաց իր ընկերների հետ վիճաբանել է նույն հիվանդանոցի անվտանգության աշխատակցի հետ, որի ընթացքում մի քանի անգամ ձեռքերով հարվածներ են հասցրել վերջինիս մարմնի տարբեր մասերին՝ պատճառելով մարմնական վնասվածք: Նախաքննության ընթացքում հարցաքննվել են մի շարք անձինք, նշանակվել է դատաբժշկական փորձաքննություն: 

Երևանի 35-ամյա բնակիչը ձերբակալվել է: Նախաքննությունը շարունակվում է:

Լիաննա Թորոսյան