Ադրբեջանցիների հետ քննարկումից 2 օր անց Արցախի իշխանությունը կծկտուր «հաշվետվություն» ներկայացրեց հանրությանը՝ ռուսական կողմի միջնորդությամբ կայացած հանդիպման մասին։ 

Ըստ պաշտոնական տեղեկության, հանդիպման ժամանակ 4 հարց է քննարկվել՝ գազի, էլեկտրականության, Ստեփանակերտ-Գորիս մայրուղու ամբողջական բացման եւ Կաշենի ու Դրմբոնի հանքավայրերում ադրբեջանական խմբի մեկանգամյա շրջայցի մասին։

Արցախի ԱԽ քարտուղար Սամվել Շահրամանյանի գլխավորած խումբը «հրատապ հումանիտար» հարցերի շրջանակում չի քննարկել, օրինակ, թե ինչո՞ւ պետք է Հայաստանն Արցախին կապող Լաչինի միջանցքում ռուսական վերահսկողությամբ ռենտգեն սարք տեղադրվի եւ ինֆորմացիան փոխանցվի Ադրբեջանին։ 

Այս հարցի կարեւորությունը MediaHub-ի հետ զրույցում մատնանշում է Արցախի ԱԺ պատգամավոր Մետաքսե Հակոբյանը։ 

«Մենք արդեն 2 օր է խոսում ենք այն մասին, որ քաղաքական ուժերը տեղյակ չեն այս հանդիպումից։ Հանդիպման մասին հայտարարության տեքստը ավելի շատ հարցեր առաջացրեց, քան թե փարատեց։ Մասնավորապես, ինձ մոտ մի քանի հարց է առաջացել։ Օրինակ՝ չի նշվում, թե ո՞ւմ նախաձեռնությամբ է եղել այս հանդիպումը։ Եթե արցախյան կողմի նախաձեռնությամբ է, ապա ինչո՞ւ դա չի արվել հենց դեկտեմբերի 12-ից սկսած, ինչո՞ւ պիտի մարդիկ երեք ամիս այս ամենի միջով անցնեին»,-նշեց նա։ 

Ադրբեջանական կողմը, ըստ պատգամավորի, նպատակ է ունեցել օրակարգ բերել Արցախն Ադրբեջանին ինտեգրելու հարցը․

«Քանի որ չկա վստահություն այս իշխանությունների նկատմամբ, հետեւաբար ես չեմ կարող վստահել իրենց տված ինֆորմացիային, առ այն, որ չի եղել նման քննարկում»։

Ըստ նրա՝ ադրբեջանական կողմը գնացել է հանդիպման հենց այդ նպատակով․

«Այստեղ պետք է շատ ավելի հստակ պարզաբանումներ տրվեին, թե հետագա քայլերը որոնք պիտի լինեն, արդյո՞ք Արցախի իշխանությունները չեն գնա զիջումների այդ հարցում»։

Հակոբյանը տարօրինակ է համարում այն, որ անդրադարձ չի կատարվել սկանավորման սարքերի տեղադրմանը, որովհետեւ Բայրամով-Լավրով հանդիպման ժամանակ հստակ ասվեց, որ դրանք տեղադրվելու են։

«Թեկուզ հասկանալի է, որ ռուսական վերահոսկողության տակ տեխնիկական վերազինման նպատակով դրվում է սարքավորումներ, սակայն այստեղ մի բայց մնաց, որ պիտի փարատվի ադրբեջանական կողմի կասկածները. կարող է ենթադրվել, որ ստացված ինֆորմացիան պիտի փոխանցվի ադրբեջանական կողմին։ Արդյո՞ք այս հարցերը հրատապ չէին, որ չեն քննարկվել, թե այս թեման այլեւս չի քննարկվում արցախյան իշխանությունների հետ»,-ասաց նա։ 

Թեպետ Հայաստանի իշխանություններն ամեն պատեհ եւ անպատեհ առիթներով հայտարարում են, որ Արցախի ժողովուրդն ու ղեկավարությունը պիտի որոշեն Արցախի ճակատագիրը, այդուհանդերձ, Մետաքսե Հակոբյանը վստահ է՝ Արցախի ղեկավարը շարունակում է գլխիկոր կատարել Փաշինյանի հրահանգներն ու պահանջները։

Լիա Սարգսյան