Արցախի պետնախարար Ռուբեն Վարդանյանը անդրադարձել է ՄԱԿ-ի դատարանի՝ Հայաստանի կողմից Ադրբեջանի դեմ ներկայացրած հայցի որոշմանը։
«Ինչպես հաճախ նշել եմ իմ հանրային ելույթներում՝ իրավունքը մեր կողմից է, և մենք կարող ենք տարբեր մեխանիզմների օգնությամբ ցույց տալ, որ մեր պահանջներն արդարացի են, և միջազգային իրավական գործիքակազմը կարևոր է այդ ճանապարհին։
Իմ երախտագիտությունն եմ հայտնում միջազգային իրավական հարցերով ՀՀ ներկայացուցչին, ամբողջ թիմին, այն բոլոր մարդկանց, որոնք հսկայական աշխատանք են կատարել արցախահայության արդարացի պահանջը փաստարկված տեղ հասցնելու ուղղությամբ»,- նշել է պետնախարարը։
Ավելի վաղ հայտնել էինք, որ Արդարադատության միջազգային դատարանը հրապարակեց Լաչինի միջանցքով ապաշրջափակման վերաբերյալ ժամանակավոր միջոց կիրառելու պահանջի մասին որոշումը։
Ըստ այդմ՝ դատարանն իր որոշմամբ պարտավորեցրեց Ադրբեջանին իր ստանձնած պարտականություններով ապահովել տրանսպորտի և մարդկանց անխափան տեղաշարժը Լաչինի միջանցքով՝ երկու ուղղություններով։ Այս մասին Ֆեյսբուքի իր էջում գրել է ՀՀ հատուկ հանձնարարություններով դեսպան Էդմոն Մարուքյանը:
Ըստ որոշման՝ դատարանը համարում է, որ սննդամթերքի, դեղորայքի պակասը անդառնալի հետևանք կարող է առաջացնել մարդկանց կյանքի համար։ Ադրբեջանի կողմից գազամատակարարման դադարեցումների վերաբերյալ Հայաստանի ներկայացրած ոչ բավարար ապացույցները հիմք չհանդիսացան ևս մեկ պարտավորության համար։