MediaHub-ի հրապարակած՝ «Սկանդալ Արմավիրի քոլեջներից մեկում» վերտառությամբ հոդվածը երեկ ԿԳՄՍ նախարարության աշխատակիցներին «գործուղել» է Արմավիրի տարածաշրջանային քոլեջ, որտեղ ամիսներ շարունակ դասադուլ է՝ քոլեջի տնօրեն Անգին Արշակյանի հրաժարականի պահանջով։
Քոլեջի տնտեսագիտական ամբիոնի վարիչ Թագուհի Հովակիմյանը MediaHub-ի հետ զրույցում ասաց, որ մեր հրապարակած նյութից հետո նախարարության աշխատակիցները՝ ԿԳՄՍՆ գլխավոր քարտուղար Գագիկ Սաֆարյանի հետ գնացել են քոլեջ, մի քանի ժամ Անգին Արշակյանի սենյակում փակվելուց հետո հայտարարել, որ հարցը լուծված է, Արշակյանին համոզել են՝ գնում է, նոր տնօրենի ժամանակավոր պաշտոնակատար է նշանակվում։ Սակայն ինչպես պնդում է քոլեջի դասախոսը՝ «հերթական անգամ թոզ են փչել ու հեռացել»
«Համաձայնվեցինք, որ նրան ուղարկեն արձակուրդ, պայմանով, որ կնիքը ձեռքից վերցնեն։ Թե ներսում ինչ են խոսել, մենք տեղյակ չենք։ Նախարարության աշխատակիցները ասացին, թե Արշակյանը արձագուրդ գնալու դիմումը գրել է, մեզ էլ հորդորեցին՝ տուն գնալ, հաջորդ օրվանից անցնել դասապրոցեսին։ Երեկոյան տեղեկանում ենք, որ ո՛չ դիմում է գրվել, ո՛չ կնիքն են վերցրել նրա ձեռքից, ո՛չ ընդունում հանձնում է եղել։ Այսօր եկել եմ գործի, պատերին եմ նայում, թե որտեղ է իմ՝ աշխատանքից ազատման հրամանը փակցրած։ Արշակյանը արդեն 6 հգու ազատել աշխատանքից, հերթում եւս 11 դասախոս է, այդ թվում նաեւ ես»,-ասաց Թագուհի Հովակիմյանը։
Անգին Արշակյանը Արմավիրի տարածաշրջանային քոլեջի տնօրենի աթոռը չի թողնում, քանի որ թիկունքում ունի իշխանության մեջ հովանավորներ, ասում են քոլեջի դասախոսներն ու պնդում՝ ԿԳՄՍ հոխնախարար Ժաննա Անդրեասյանն անձամբ է Արշակյանին գործի նշանակել։
«Մեր քոլեջի դասախոսները 2018թ․-ին գնում էին Փաշինյանի հավաքներին, մասնակցել են իշխանափոխությանը, միահամուռ ձեւով Նիկոլ էին պաշտպանում, բա ու՞ր ա էսօր էդ Նիկոլը, ու՞ր ա։ Խի չի գալիս, այդքան էլ դիմեցինք, խ՞ի չի գալիս էդ գժին տանի։ Ամեն օր մեզ ահաբեկում է, ամեն օր, որ աշխատանքից ազատելու է»,-նշեց քոլեջի դասախոսը՝ հույս ունենալով, որ պատկան մարմինները աչք չեն փակի քոլեջի ճակատագրի վրա։
2021թ. նոյեմբերի 4-ին ԿԳՄՍ նախարարի տեղակալ Ժաննա Անդրեասյանը անձամբ է գնացել Արմավիրի տարածաշրջանային քոլեջ եւ ներկայացրել Անգին Արշակյանին, որպես քոլեջի ժամանակավոր պաշտոնակատար, քանի որ նախորդ տնօրենի պաշտոնավարման ժամկետը լրացել էր: Ինչպես նշեց զրուցակիցս՝ պաշտոնավարումից ի վեր Անգին Արշակյանը 37 հոգու աշխատաքնից ազատել է, իր դեմ բողոքի ակցիաներ իրականացրած դասախոսներից եւս 11 հոգու խիստ նկատողություն է տվել։
Խնդրի վերաբերյալ փորձեցին պարզաբանում ստանալ նաեւ ԿԳՄՍ նախարարությունից։ Գերատեսչության մամուլի խոսնակ Գեղամ Մելիքբեկյանն ասաց, որ Կրթության եւ աշխատանքի տեսչությունները քոլեջի դասախոսների բողոքների հիման վրա իրականացրել են ուսումնասիրություններ, որի արդյունքում կազմվել է եզրակացություն։
«Ըստ ընթացակարգի՝ տնօրենը այդ եզրակացության որոշ կետերի վերաբերյալ պետք է համաձայնություն կամ անհամաձայնություն հայտնի, նա պետք է իր նկատառումները արտահայտի, հիմա այդ փուլում ենք։ Հնգօրյա ժամկետ է տրված, սպասում ենք, որ այդ եզրակացությունները վերջնական տեսքի գան, ըստ դրա որոշում կայացվի»,-ասաց նա։
Լիա Սարգսյան