«Հրապարակ» թերթը գրում է. «Կառավարությունը պատրաստվում է 1 միլիարդ 38 միլիոն դրամ ծախսել՝ 49 նոր ծառայողական ավտոմեքենա ձեռք բերելու համար։

Երեկ կառավարության նիստում Պետական գույքի կառավարման կոմիտեին գումար հատկացնելու որոշում ընդունվեց, որով գնելու են Volvo XC90 ներկայացուցչական ամենագնաց․ արժեքը՝ 43,8 միլիոն դրամ՝ մոտ 110 հազար դոլար։ 6 հատ Volvo EX30 էլեկտրական մեքենա` 90 միլիոն դրամով: 39 հատ Volvo EX30 մեքենա․ յուրաքանչյուրը՝ 2 մլն, ընդհանուր՝ 780 միլիոն դրամ։ Եվ 3 հատ ներկայացուցչական դասի Volvo S90 Plug Hybrid սեդան ավտոմեքենա, յուրաքանչյուրը՝ 41,6 մլն դրամ, բոլորը՝ 2024 թվականի արտադրության։

Թե այս մեքենաները որ պաշտոնյաներին են սպասարկելու, որոշման մեջ չի նշվում»:

«Իրավունք» թերթը գրում է. «Հիշո՞ւ մեք` «Իրավունք»-ը գրել էր, որ կառավարության նիստից հետո Նիկոլ Փաշինյանի մոտ ստուգարք են հանձնելու մարզպետները: Մասնավորապես, վերջիններիս հանձնարարված էր ստուգել մարզի բնակիչների տրամադրվածությունն իրենց թիմի նկատմամբ եւ արդյունքների մասին զեկուցել շեֆին:

Եվ այսպես` պարզվում է` Նիկոլի մոտ մարզպետների քնությունն այդքան էլ հարթ չի անցել։ Պատճառը Նիկոլի կինն է` Աննա Հակոբյանը, առանց որի ոչ մեկ շեֆի աչքին չի կարող բարձրանալ։

Մեր աղբյուրների փոխանցմամբ` այս պահին Նիկոլի մոտ քարտ բլանշ է ստացել մարզպետներից միայն Շիրակի մարզպետ Մուշեղ Մուրադյանը, ով պարբերաբար սիրաշահում է շեֆի տիկնոջը, հրավիրում տարբեր միջոցառումների ու անձամբ հոտնկայսդ իմավորում ու ճանապարհում։

«Հրապարակ» օրաթերթը գրում է․ Հայ-ադրբեջանական սահմանազատման համատեղ հանձնաժողովի կանոնակարգը, որը պետք է հաստատվեր հուլիսի 1-ին, դեռ կողմերի միջեւ համաձայնեցված չէ․ բանակցությունները, ըստ իշխանական աղբյուրի, կառուցողական հուն չեն մտել: Իսկ այդ կանոնակարգով իբրեւ թե պետք է իրականացվեր սահմանազատումը` գծվեին հայ-ադրբեջանական սահմանները, եւ պետք է սահմանվեր, թե որ տարածքն է հաջորդից սահմանազատվելու: Պետք է ամրագրվեր, որ սահմանազատումն իրականացվում է Ալմա-Աթայի հռչակագրով եւ այդ ժամանակների քարտեզով։ Սակայն Ադրբեջանը տավուշյան 4 գյուղերը ստանալուց հետո պահանջում է, որ ինքը որոշի, թե որն է սահմանազատվող հաջորդ տարածքը:

Հայկական կողմը դիմադրում է՝ ասելով, թե առանց այն էլ մեկնարկը տրվել է ձեր ուզածով, հիմա պետք է գործընթացը տեղափոխել այն տարածքներ, որտեղ 44-օրյա պատերազմից հետո ադրբեջանական կողմն օկուպացրել է ՀՀ սուվերեն հողը՝ Ջերմուկի, Գեղարքունիքի հատվածներ։ 

Հակառակ պարագայում, եթե հաջորդ քայլն էլ Ադրբեջանի օգտին լինի, հայաստանյան ներքաղաքական գործընթացները կարող են անկանխատեսելի դառնալ։ Իսկ Ադրբեջանը համառորեն ցանկանում է շարունակել Սյունիք-Նախիջեւան հատվածում, որ այս փուլում էլ Տիգրանաշենը ստանա։ Նաեւ պահանջում է նախ անդրադառնալ 4 անկլավներին` Տավուշի մարզի 3-ին ու Տիգրանաշենին, իսկ դա ոչ թե սահմանազատման, այլ միակողմանի հանձնման քայլ է լինելու: Եվ հրաժարվում է Ալմա-Աթայի հռչակագիրն ամրագրել կանոնակարգում: Իմաստն այն է, որ յուրաքանչյուր հատվածում նոր հիմքեր մոգոնեն` Տավուշում 76 թվի քարտեզն էր, հաջորդում բոլորովին այլ հիմք կլինի։ 

ԱԺ նախագահ Ալեն Սիմոնյանը երեկ, ըստ էության, չթաքցրեց, որ սահմանազատման գործընթացը սառեցված է։ Միայն «հույս հայտնեց», որ սահմանը կվերարտադրվի Ալմա-Աթայի հռչակագրի սկզբունքների հիման վրա։