Ես միշտ եմ ասել՝ Հայկ Մարությանի տեղը բեմն է, ուրախ եմ, որ վերադարձել է այնտեղ։ Այս մասին MediaHub.am-ի հետ զրույցում ասաց ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը։

«Երբ քննարկվում էր Հայկ Մարությանին քաղաքապետի թեկնածու առաջադրելու հարցը, ես վարչության անդամ էի։ Ես իր ներկայությամբ բաց տեքստով ասել եմ՝ լավ քաղաքացի է, լավ դերասան, պրոդյուսեր, բայց ես իրեն չեմ տեսնում քաղաքապետի պաշտոնում։ Ասացի՝ պարոն Մարության, դուք թիմային մտածողություն չունեք, նպատակահարմար չէ, որ քաղաքապետի մեր թեկնածուն լինեք։ Եթե հիմա թատրոնով քարոզարաշավ է իրականացնում, ասեմ՝ հիմա էլ մնում եմ իմ կարծիքին ՝ լավ քաղաքապետ լինել չի կարող։ Իր մոտեցումները համակարգային չեն եղել, սիտուատիվ են “կամազային”»,-ասաց Հովիկ Աղազարյանը։ (Նկատի ունի կամազների հետ կապված սկանդալը – խմբ.)

Անդրադառնալով հարցին՝ իսկ ներկայացման տոմս գնե՞լ է, ասում են թեև անոնսի մեջ թիրախը Էդմոն Մարուքյանն է, բայց բուն ներկայացման թիրախը հենց Նիկոլ Փաշինանն է լինելու իր թիմակիցներով հանդերձ, Հովիկ Աղազարյանն ասաց, որ Հայկ Մարությանի մասնակցությամբ բոլոր ֆիլմերը, հումորային հոլովակները դիտել է, բայց «Քաղաքապետը» ներկայացման տոմս չի գնել.
«Ինչո՞ւ փող ծախսեմ, հետո հեռուստացույցով ցույց կտան, կնայեմ»,-ասաց նա։

Անդրադառնալով հարցին՝ ՔՊ-ն հետամուտքո՞վ է ճանապարհել Հայկ Մարությանին,
Հովիկ Աղազարյանն ասաց․ «Դուռը բացել ենք, ասել ենք՝ գնա։ Եթե քաղաքապետի ընտրություններին է պատրաստվում, հետո այլ մանրամասներ էլ կներկայացնեմ։ Դեռ «Ելք» –ի ժամանակ իրեն առաջարկել էինք մեր քաղաքապետի թեկնածուն լիներ, մերժեց, իսկ հեղափոխությունից հետո, երբ ամեն ինչ սկուտեղի վրա էր՝ համաձայնեց, ՔՊ-ին անդամագրվեց։ Պատերազմից հետո էլ կուսակցությունից փախավ»,-ասաց նա։

Իշխանական պատգամավորին հիշեցրեցինք, որ Հայկ Մարությանը իրենց թիմի հասցեին մի շարք մեղադրանքներ էր հնչեցրել, ներկայացման մեջ կարող են փակագծերն ավելի բացվել, ինչին ի պատասխան Աղազարյանն ասաց․
«Էդ որ ասում է ՝ ինձ զանգում էին, զանգում էին, զանգողներից մեկն էլ ես եմ եղել։ Ամբողջ 3 տարվա ընթացքում մի անգամ եմ զանգել իրեն։ Մի ներդրող կա, որ ուզում էր ներդրում կատարել՝ կա՛մ պետք է քաղաքապետարանը հողը առներ ներդրողից, կա՛մ թույլ տար խելքին մոտիկ շինարարություն։ Արդյունքում խոստացավ, որ կնայի, որոշում կկայացնի, ձգձգեց, հետո ներդրողը ինձնից ներողություն խնդրեց, իր ծառայություններից ներդրողը հրաժարվեց, հետո շատ արագ ձևով այդ հարցը լուծեց»,-եզրափակեց նա։

Անի Գևորգյան