Սիրիայի հեռացած նախագահ Բաշար ալ-Ասադի կինը երկիրը լքելուց մի քանի շաբաթ առաջ Մոսկվայում սկսել է քաղցկեղի ռեցիդիվից բուժումը, հայտնել է Financial Times-ը՝ վկայակոչելով իրավիճակին ծանոթ աղբյուրներին:
Ասադը հանդիպել է կնոջ հետ Ռուսաստանի մայրաքաղաք ժամանելուց հետո։ Նրա մայրն ու հայրը՝ Ֆավազ ալ-Ախրասը, նույնպես Մոսկվայում են։ Ասադների հետ միասին, ըստ FT-ի, Մոսկվայում է նրանց դուստրը՝ Զեյնը, ով սովորել է Աբու Դաբիի Սորբոնի համալսարանում։ Դեկտեմբերի սկզբին Ասադի ավագ որդին՝ Հաֆեզը, պաշտպանել է իր թեկնածուական թեզը Մոսկվայի պետական համալսարանում։
2024 թվականի մայիսին Ասմա Ասադի մոտ ախտորոշվել է սուր միելոիդ լեյկոզ։ Մինչ այս՝ 2018 թվականի օգոստոսին, Սիրիայի նախկին առաջին տիկնոջ մոտ կրծքագեղձի վաղ փուլի քաղցկեղ էին ախտորոշել, և նա բուժվել էր Դամասկոսի զինվորական հոսպիտալում։ 2019 թվականի հունվարին նա հեռացրել էր ուռուցքը։ Նույն թվականի օգոստոսին հայտարարել էր, որ ապաքինվել է։
Դեկտեմբերի 8-ի գիշերը զինված ընդդիմության մարտիկները մտել էին Դամասկոս՝ հայտարարելով Ասադի ռեժիմի տապալման մասին։ Նախկին նախագահը հեռացել էր Ռուսաստան, որը նրան ապաստան է տվել։ Փախուստը կազմակերպվել էր նաև ռուսական հետախուզության աշխատակիցների օգնությամբ, գրել է Bloomberg-ը՝ հղում անելով աղբյուրներին։ Նրան դուրս էին բերել Սիրիայում ռուսական ավիաբազայի միջոցով։ Գործակալությունը պարզաբանել էր, որ Ասադի մեկնելու ժամանակ ինքնաթիռի տրանսպոնդերն անջատվել էր, որպեսզի դրան չհետևեն։ Մինչ հեռանալը, Ռուսաստանը համոզել էր Սիրիայի նախկին նախագահին, որ նա կպարտվի զինված ապստամբների դեմ պայքարում, նշել էր գործակալությունը։
Մոսկվա ժամանելուց գրեթե մեկ շաբաթ անց՝ դեկտեմբերի 16-ին, Ասադն իր առաջին հայտարարությունն էր արել։ Նա ասել էր, որ Դամասկոսում մնացել է մինչեւ դեկտեմբերի 8-ի առավոտ, իսկ Սիրիայում՝ մինչեւ նույն օրվա երեկո։ Ասադն ասել էր, որ լքել է երկիրը, երբ պարզ է դարձել, որ «բանակի դիրքերն ընկել են»։