Վանաձորի ավագանու «Հայրենիք» խմբակցության ղեկավար Վահե Դոխոյանը ֆեյսբուքյան էջում գրել է․
«Վանաձոր համայնքի սիրելի բնակիչներ,
Վանաձորի ավագանու խմբակցություններից իշխանական հատվածին այսօր հաջողվեց գումարել ավագանու արտահերթ նիստ և քվեարկությամբ ընդունել այնպիսի որոշումներ, որոնք միտված են համայնքային իշխանությունը համայնքի բնակչությունից խլելուն: Ցավով պետք է արձանագրեմ, որ այդ անհանդուրժելի արարքին միացան նաև ավագանու ամենամեծ խմբակցության բանտարկված ղեկավարի որոշ թիմակիցներ: Ցավալի է նաև այն հանգամանքը, որ օրեր առաջ իմ հայտարարությանը, որը շատ կոնկրետ առաջարկությամբ գալիս էր լուծելու արդեն շուրջ մեկ տարի տևող այս ճգնաժամը՝ չարձագանքեց նաև «Մամիկոն Ասլանյան դաշինք» խմբակցությունը: Մինչդեռ ակնհայտ է, որ առաջարկիս գլխավոր պատասխանատուն հենց այդ խմբակցությունն էր ու դրա առաջնորդը:
Խիստ մտահոգիչ է նաև ավագանու նիստում «Մամիկոն Ասլանյան դաշինք» խմբակցության ներկայացուցիչներ Սեյրան Ղամբարյանի և Գայանե Քալանթարյանի մասնակցությունը, որի շնորհիվ չընտրված քաղաքապետը ստացավ անհարժեշտ քվորում: Միաժամանակ առանձին ուշադրության է արժանի նույն խմբակցության ներկայացուցիչների հայտարարությունն այն մասին, որ Մամիկոն Ասլանյանը տեղյակ է իրենց այդ որոշման մասին: Ավագանու անդամների այդ մասնակցության և հայտարարության վերաբերյալ ակնկալում ենք «Մամիկոն Ասլանյան դաշինք» խմբակցության հստակ և ուղիղ արձագանքը:
Վանաձոր համայնքի «Հայրենիք» խմբակցությունը, անձամբ ես ու մեր քաղաքական թիմը պահպանում է իր այն համոզմունքը, որ վանաձորցու քվեն և վստահությունը սակարկման ենթակա չեն։ Միայն Վանաձոր համայնքի բնակիչը կարող է որոշել, թե ով պետք է կառավարի մեր սիրելի համայնքը։
Մենք շարունակում ենք պնդել, որ օրենքով սահմանված հնարավորինս սեղմ ժամկետներում Վանաձոր համայնքի ավագանու նոր ընտրություն անցկացնելը առաջնահերթություն է անկախ այն հանգամանքից, թե որ խմբակցությունը իշխանության հետ կուլիսային ինչ պայմանավորվածությունների է հասել»: