Ռուսաստանի փոխարտգործնախարար Միխայիլ Գալուզինը TASS-ին տված բացառիկ հարցազրույցում խոսել է Ուկրաինայի շուրջ բանակցությունների հնարավորությունների, Մոլդովայում վիճակի, ինչպես նաև հետխորհրդային տարածքում ռազմական ենթակառուցվածքների տեղակայման ԱՄՆ փորձերի մասին։
- Տեսանելի ապագայում կարո՞ղ է խաղաղության պայմանագիր կնքվել Բաքվի և Երևանի միջև։ Ո՞րն է հայ-ադրբեջանական կարգավորման հասնելու գլխավոր խոչընդոտը։
- Ռուսաստանը նպատակաուղղված ջանքեր է գործադրում Բաքվի եւ Երեւանի միջեւ հարաբերությունները կարգավորելու համար։ Դրանք հիմնված են 2020-2022 թվականների ամենաբարձր մակարդակով եռակողմ համաձայնագրերի վրա, որոնք նախատեսում են մի շարք առաջնահերթ միջոցառումներ, այդ թվում՝ երկու երկրների միջև տրանսպորտային կապերի ապաշրջափակում, հայ-ադրբեջանական սահմանի սահմանազատում և զարգացում, քաղաքացիական հասարակության միջոցով շփումներ: Մենք հետևողական աջակցություն ենք ցուցաբերում կողմերին խաղաղության պայմանագրի մշակման գործում։
Այս քայլերը միասին վերցրած պետք է հանգեցնեն տարածաշրջանում կայուն և արդար խաղաղության պայմանների ստեղծմանը, ինչը կարտացոլվի խաղաղության պայմանագրում։ Մեր միջնորդությունը կառուցողական և բովանդակալից երկխոսության ապահովումն է՝ երկու կողմերի շահերը հաշվի առնող փոխընդունելի լուծումներ գտնելու համար։ Խաղաղության ճանապարհին բազմաթիվ խոչընդոտներ կան։ Հայաստանի և Ադրբեջանի միջև հակամարտությունը արմատացած է պատմության մեջ, դրա վերջնական կարգավորմանը հասնելու համար անհրաժեշտ է ժամանակ և համբերություն, այնպիսի պայմանների ձևավորում, որոնք կապահովեն երկկողմ համաձայնագրերի ուժը, հուսալիությունը և կայունությունը: Հենց դրան է ձգտում Ռուսաստանը, որի համար Անդրկովկասում խաղաղությունն ու կայունությունը միշտ առաջին պլանում կլինեն։