Նիկոլ Փաշինյանի և նախարարների՝ Ազգային ժողովում պատգամավորների հետ հարցուպատասխանի ժամանակ «Հայաստան» խմբակցության պատգամավոր Ագնեսա Խամոյանը հարց ուղղեց Նիկոլ Փաշինյանին այն մասին, որ երեկ հայտնի դարձավ, որ վերջինս հրաժարվել է մասնակցել նոյեմբերի 23-ին Մինսկում կայանալիք ՀԱՊԿ գագաթնաժողովին։
Խամոյանը հիշեցրեց նաև հոկտեմբերի 12-ին Բիշքեկում՝ ԱՊՀ գագաթնաժողովին վարչապետի ու ԱԳ նախարարի բացակայությունը, նոյեմբերի 8-ին Մոսկվայում տեղի ունեցած ԱՊՀ անվտանգության խորհրդի քարտուղարների հերթական հանդիպմանն ԱԽ քարտուղարի չմասնակցելը, ՀԱՊԿ պաշտպանության նախարարների խորհրդի նիստից Սուրեն Պապիկյանի բացակայությունը։
«Սրան զուգահեռ Հայաստանը հրաժարվել է ՀԱՊԿ գլխավոր քարտուղարի տեղակալի իր քվոտայից։ Ետ է կանչել ՀԱՊԿ-ում իր ներկայացուցչին, նորին չի նշանակել, հրաժարվել է Հայաստանում նախատեսված ՀԱՊԿ զորավարժություններից։ Շատ ուղիղ հարց եմ տալիս։ Ի՞նչ է այս ամենը նշանակում։ Ձեր այս քայլով արդյո՞ք ՀԱՊԿ-ից դուրս գալու հող եք նախապատրաստում։ Եթե այո, ապա հստակ ձևակերպեք, լավ կամ վատ, բայց, այդուհանդերձ, հողի վրա գոյություն ունեցող անվտանգային համակարգը ի՞նչ անվտանգային համակարգով եք պատրաստվում փոխել։
Եթե չեք պատրաստվում դուրս գալ, ապա ճի՞շտ եմ հասկանում, որ ստացվում է, որ նեղացկոտ երեխայի քաղաքականությամբ եք որոշել ՀԱՊԿ անդամներին ու մասնավորապես Ռուսաստանին, էսպես ասած «խելքի բերել»»։
Նիկոլ Փաշինյանը պատասխանեց. «Եթե նույնիսկ ձեր հնչեցրած բառապաշարին, բոլորին չկարողանամ արձագանքել, ինքնին որևէ լռություն չի նշանակում ձեր արած որևէ ձևակերպման հետ համաձայնություն։ Քավ լիցի, մենք չենք պատրաստվում և մեր մտքում էլ չկա այդպիսի բան։ Ես խորհուրդ կտայի ձեզ նման բառապաշար չօգտագործել՝ «խելքի բերել» որևէ մեկին։ Ես կնախընտրեի ասել ոչ թե «հրաժարվել ենքչ, այլ «որոշում ենք կայացրել» կոնկրետ այդ միջոցառումներին ներկա չգտնվել տարբեր պատճառներով»։
Մանրամասները՝ տեսանյութում»