Մեծ Բրիտանիայի վարչապետի թեկնածուներին խորհուրդ են տվել «նայել հայելու մեջ»՝ Շոտլանդիայի կառավարության նկատմամբ ավելի մեծ վերահսկողության կոչերի պատճառով, հայտնել է PA Media-ն։
Լիզ Թրասը եւ Ռիշի Սունակը օգտագործել են իրենց քարոզարշավը՝ Ուեսթմինսթերի եւ Մեծ Բրիտանիայի կառավարության նիստերում Շոտլանդիայի նախարարների նկատմամբ վերահսկողությունը մեծացնելու ծրագրերի մասին հայտարարելու նպատակով:
Շոտլանդիայի արդարադատության նախարար Քիթ Բրաունն ասել է, որ եւ՛ Թրասը, եւ՛ Սունակը նախկինում անտեսել են Շոտլանդիայի խորհրդարանում անցկացվող հանդիպումները:
Այս տարվա սկզբին Ռիշի Սունակին խնդրել են հանդիպել Շոտլանդիայի խորհրդարանի ֆինանսական հանձնաժողովի հետ՝ նախաբյուջեի վերանայման շրջանակներում, սակայն, ըստ Բրաունի, Սունակը չի արձագանքել հրավերին:
Եվ Թրասը, ով այդ ժամանակ Միացյալ Թագավորության կառավարության գանձապետարանի գլխավոր քարտուղարն էր, հրաժարվել է 2018 թվականին Շոտլանդիայի խորհրդարանի ֆինանսների եւ սահմանադրության մասին հանձնաժողովի կազմում ընդգրկվելուց:
«Այն փաստը, որ Թրասը եւ Սունակը երբեք չեն ներկայացել Հոլիրուդի հանձնաժողովին, ցույց է տալիս, թե նրանք որքան են արհամարհական վերաբերմունք ունեն Շոտլանդիայի եւ շոտլանդական խորհրդարանի նկատմամբ: Երբ հարցը վերաբերում է վերահսկողություն ձեռք բերելուն, նրանք նախ պետք է նայեն հայելու մեջ: Իրականությունն այն է, որ այժմ նրանք երկուսն էլ վախենում են կառավարությունում իրենց արդյունքներից: Նրանք երկուսն էլ գիտեն, որ իրենց աղետալի ձախողումները կբացահայտվեն պատգամավորների հարցաքննության ժամանակ: Ե՛վ Թրասը, եւ՛ Սունակը այս տխուր քարոզարշավի ընթացքում ապացուցել են, որ հարգանք չունեն Շոտլանդիայի նկատմամբ. Թրասն ասել է, որ անտեսելու է դեմոկրատական ճանապարհով ընտրված առաջին նախարարին, իսկ Ռիշի Սունակը հայտնել է լիազորությունների հանձնման գործարքը ամբողջությամբ տապալելու իր մտադրության մասին», - ասել է Բրաունը:
Նա հավելել է, որ երկու թեկնածուներն էլ Շոտլանդիայի նկատմամբ «անհարգանքից» բացի ոչինչ չեն առաջարկում։