Որ «խնդրեն» էլ, չի դնի. ի՞նչ է սպասվում Գեղամ Նազարյանին

«Հայաստան» դաշինքից այսօր հայտնեցին, որ խմբախցությունում քննարկելու են Գեղամ Նազարյանի հետագա գործունեության հարցը, քանի որ Նազարյանը հայտարարել է, թե Նիկոլ Փաշինյանի հեռացման օրակարգ չկա:

MediaHub-ը կապ հաստատեց Գեղամ Նազարյանի հետ` ստանալու իր մեկնաբանությունն այս թեմայի վերաբերյալ:

-Պարո´ն Նազարյան, ինչպե՞ս կմեկնաբանեք այս խոսակցությունները, որ խմբակցությունում պատրաստվում են Ձեր հետագա գործունեության հարցը քննարկել:

-Հիմա չեմ մեկնաբանում, Վահե ջան, մի հատ ես իրենց տեսնեմ, իրենց չեմ տեսել, էլի, տեսնեմ ինչ են ասում, նոր կմեկնաբանեմ:

-Իսկ արդա՞ր են այդ մեղադրանքները, որ Դուք իշխանությունների հետ ջերմացել եք և այլևս Նիկոլ Փաշինյանի հեռացման օրակարգ չկա Ձեզ համար:

-Դա դատարկ թեմա է, դրա համար ո´չ հերքում եմ, ո´չ խոսում եմ, դա էդ թեման չի, էլի:

-Իսկ եթե Ձեզ հորդորեն կամ «խնդրեն» մանդատը դնել, ինչպես Փաշինյանն է իր թիմակիցներին «խնդրում», կդնե՞ք:

-Ես խնդրում եմ, էլի, հիմա ես էդ թեմաներով չեմ ուզում խոսել:

-Ամեն դեպքում, մանդատը դնելու մտադրություն կա՞ Ձեր կողմից, եթե նույնիսկ շատ «խնդրեն» կամ հորդորեն:

-Չէ, չկա, ճիշտն ասած: Ես չեմ կարծում, որ կխնդրեն, բայց չկա: 

-Իսկ Դուք իշխանականների հետ ի՞նչ հարաբերություն կամ շփումներ ունեք, ջերմացե՞լ են հարաբերությունները:

-Ես ասացի, չէ՞, ես հիմա մեկնաբանություն չեմ տալիս: Եթե նույնիսկ հարցի պատասխանը շատ պարզ է, ես էլի չեմ մեկնաբանի:

-Իսկ «Հայաստան» խմբակցությունից այս հարցով դիմե՞լ են Ձեզ, որովհետև Ագնեսա Խամոյանն, օրինակ, ասել է, որ նիստ է լինելու և քննարկելու են Ձեր հարցը: 

-Դե, ինձ հետ չեն քննարկել նիստի հետ կապված, ես խոսել եմ ֆրակցիայի նախագահի ու քարտուղարի հետ ընդամենը:

-Ա՞յս թեմայով:

-Ընդհանուր թեմաներով:

-Իսկ ի՞նչ են ասել իրենք, որևէ կերպ Ձեզ հորդորե՞լ են մանդատը դնել:

-Չէ, չէ, ոչ մի տենց բան չի եղել, ընդհանրական խոսակցություն է եղել:

Վահե Մակարյան