Ամերիկուհին 4 սրտի կանգ է ունեցել մարզման ժամանակ էներգետիկ ըմպելիք խմելուց հետո, հայտնում է The Sun-ը։
Այովա նահանգից Ժասմին Գարզան իր ընկերոջ՝ Իսահակի հետ ավարտելիս է եղել մարզումը և էներգետիկ ըմպելիք է խմել։ Դրանից հետո նա գլխապտույտ ու թուլություն է զգացել։ Շուտով նրա մոտ քթից արյունահոսություն է սկսվել, որից հետո ամերիկուհին կորցրել է գիտակցությունը և ընկել հատակին՝ սկսելով ջղաձգվել։
Իսահակը անմիջապես շտապել է օգնության և հայտնաբերել, որ Ժասմինի սիրտը կանգ է առել, և նա դադարել է շնչել: Մինչ բժիշկները փորձում էին կայունացնել նրա վիճակը, Ժասմինի սիրտը չորս անգամ կանգ է առել։
«Ամենաերկարը, որ իմ սիրտը չի բաբախել, մոտավորապես հինգ րոպե է եղել», - ասել է Գարզան:
Նրան տեղափոխել են հիվանդանոց, որտեղ նրան նշանակել են կենսապահովման։ Բացի այդ, հիվանդի երիկամներն ու ստամոքսը խափանվել են, իսկ թոքերը գտնվում էին ծայրահեղ ծանր վիճակում։ Բժիշկները բազմաթիվ թեստեր են անցկացրել, սակայն չեն կարողացել պարզել սրտի կանգի ճշգրիտ պատճառը. բոլոր թեստերը ցույց են տվել, որ այն նորմալ է:
Երկու շաբաթ հիվանդանոցում մնալուց հետո Ժասմինը դուրս է գրվել, սակայն բժիշկները դեռ չեն կարողանում բացատրել, թե կոնկրետ ինչն է սրտի կանգի պատճառ դարձել: Ինքը՝ կինը, կարծում է, որ պատճառը կարող էր լինել էներգետիկ ըմպելիքի և նախկինում չախտորոշված սրտի հիվանդությունների համադրությունը։
Նա շեշտում է, որ էներգետիկ ըմպելիքը, ամենայն հավանականությամբ, չի եղել հիմնական պատճառը, բայց կարող էր կատալիզատոր լինել։ .
«Ես զգում եմ, որ ինձ երկրորդ հնարավորություն է տրվել, և ես ուզում եմ ամեն ինչ անել այս կյանքը լիարժեք ապրելու համար», - ավելացրել է Գարզան: