ՄԱԿ-ի հայաստանյան գրասենյակի առջեւ այսօր՝ դեկտեմբերի 17-ին, բժիշկների կազմակերպած բողոքի ակցիան ավարտվեց: Նրանք միջազգային կառույցներից պահանջել են հիվանդների համար ապահովել ազատ տեղաշարժման համամարդկային իրավունքի եւ դեղերի հասանելիությունը։
ԵՊԲՀ վիրաբուժական ամբիոնի վարիչ Գագիկ Հակոբյանը իր և մյուս բժիշկների անունից հայտարարեց՝ ցանկանում են մեկնել Արցախ և սատար կանգնել իրենց գործընկերներին՝ շրջափակման պայմաններում իրենց մասնագիտական պարտքն իրականացնելու գործում։
«Եթե միջազգային հանրությունը սանավիացիա տրամադրի, մեր շատ գործընկերներ այսօր, հենց այս գիշեր պատրաստ են մեկնել և այն ծանր հիվանդներին, որոնք այսօր Արցախում են գտնվում, օգնել»,- ասաց Գագիկ Հակոբյանը։
Նա դիմեց համաշխարհային մարդասիրական կազմակերպություններին, որոնք միշտ հումանիզմ են քարոզել․
«Երեկ ցույց էին տալիս, թե ձմեռվա այս ցրտաշունչ պայմաններում Արցախում ծննդկանը երեխային ինչպես, ինչ միջոցներով է տաքացնում։ Դա ուղղակի բարբարոսություն է, դա ոչ մի կերպ չի կարելի արդարացնել»։
Ակցիայի մասնակիցները նշեցին․
«Եթե արցախցին այսօր ստեղծված անմարդկային պայմանների հետեւանքով լքի Արցախը, վաղն այդ նույն պայմանները ստեղծվելու են Հայաստանի համար: Հայերը հազարամյակներով ապրել են այդ տարածքում, բազմաթիվ թշնամիներ եկել եւ անցել են, բայց ոչ մեկին չի հաջողվել մեզ կոտրել: Մենք խաղաղություն ենք ուզում, բայց թույլ չենք տա, որ մեր հայրենակիցներին նսեմացնեն աշխարհի լռության ներքո»,- նշեցին նրանք:
ԵՊԲՀ վիրաբուժական ամբիոնի վարիչն իր ու գործընկերների անունից ուղերձ հղեց նաև Արցախին․
«Մենք Արցախի մեր հայրենակիցներին ուղերձ ենք հղում՝ երբեք չընկճվեք, մենք էլ ենք պատրաստ բլոկադայի մեջ մտնել, մենք էլ ենք այդ ճանապարհով անցել 90-ականներին, պատրաստ ենք ձեզ հետ այդ ամենը տանել, մի բռունցք լինել, միասին լինել։ Միշտ հաղթում է այն ազգը, որը պայքարում է։ Ծնկած ազգը երբեք չի հաղթի» ։