2022 թվականի ապրիլի 30-ին մեր բողոքի ակցիայի ընթացքում, երբ մենք Նալբանդյան փողոցով բարձրանում էինք դեպի Ազատության հրապարակ, Թումանյան-Նալբանդյան հատվածում, որտեղ խանութներ կան, մեկը ձեռքով մեզ ցույց տվեց ու ասաց՝ հլը էս փնթիներին նայեք ։ Այդ մասին այսօր Արմավիրի մարզի ընդանուր իրավասության դատարանի Էջմիածնի նստավայրի դիմաց լրագրողների հետ զրույցում ասաց զոհված զինծառայողներից մեկի մորաքույրը՝ Անահիտ Մանասյանը, որը դատարան էր եկել՝ աջակցելու լրագրող Լիա Սարգսյանին։

Մանասյանը պատմեց, որ ինքն էլ է արձագանքել այդ արտահայտությանը՝ ասելով՝ տեսա՞ք, որ մեզ փնթի ասաց։

«Ծնողներն ու այդ անձը կոշտ խոսակցություն ունեցան։ Բազմաթիվ ծնողներ լսել էին այդ արտահայտությունը։ Հետո արդեն այն վիճակը սկսվեց, որ ես ոստիկաններին խնդրեցի՝ փորձեն հանդարտեցնել վիճակը, որ ոչինչ չլինի, մենք մեր ակցիան շարունակենք։ Մենք չգիտեինք, որ այդ տղան Աջափնյակի փոխթաղապետն է, լրագրողի միջոցով իմացանք»,- ներկայացրեց նա։

Եվ լրագրողին, որը բացահայտել է, թե ով է զոհվածների ծնողներին «փնթիներ» ասել, դատի են տվել։

«Սա իշխանությունների բարոյալքված վարքագիծն է, իր գործն անող լրագրողին դատի են տալիս»,- նկատեց Անահիտ Մանասյանը։

 Նշենք, որ դատական նիստի առանցքում անցած տարի ապրիլի 30-ին Երեւանի Նալբանդյան փողոցում Ցորի զորամասի անհետ կորած զինծառայողների ծնողների եւ Սերոբ Սարգսյանի միջեւ տեղի ունեցած միջադեպն է։ Դեպքի օրը երեկոյան լրագրող Լիա Սարգսյանը «ֆեյսբուքյան» իր էջում հրապարակել էր միջադեպի վայրից լուսանկար եւ գրել․

«Նալբանդյան փողոցի այս խանութի աշխատակիցը զոհվածների ծնողների երթը տեսնելիս նրանց անվանեց՝ փնթիներ: Հռհռում էր ընկերների հետ։ Եթե դու քեզ համարում ես բարոյական մարդ, երբեք չմտնես այս խանութ»։ Այնուհետեւ, ճշտելով զոհվածների ծնողներին «փնթիներ» ասած անձի ինքնությունը, խմբագրել էր գրառումը։ 

«Զոհվածների ծնողներին «փնթիներ» ասած անձը Աջափնյակ վարչական շրջանի ղեկավարի տեղակալն է՝ Սերոբ Սարգսյանը: Խնդրեմ: Եւ այս ստորի համար զոհվել են հազարավոր տղերք, եւ այս ստորը ապրում է ձեր կողքին: Ի դեպ, տեղեկացրին, որ այս ստորը իբր կապ չունի խանութի հետ, պարզապես վախից մտավ խանութ, դուռը ներսից փակեց ու հայտարարեց. «մասնավոր տարածք ա, դուրս եկեք»: (Խմբագրված) Քիչ առաջ տեղեկացրին, որ խանութն իրենն է»,-գրել էր նա: 
Սերոբ Սարգսյանը դիմել է դատարան՝ վիրավորանքի եւ զրպարտության հիմքով։ Դատական նիստին վկայի կարգավիճակով ներկա կլինեն 44-օրյա պատերազմում Ցորի զորամասի անհետ կորած զինծառայողների ծնողները։

Մանրամասները՝ տեսանյութում։