Չանչուն ավիաշոուի ժամանակ Չինաստանն առաջին անգամ ցուցադրել է նոր սերնդի YY-20 օդանավը, որը կարող է կտրուկ մեծացնել Չինաստանի Ժողովրդական ազատագրական բանակի (PLA) օդային փոխադրումների հնարավորությունները, հաղորդում է CGTN-ը:

Օդում լիցքավորում իրականացնող օդանավը հագեցած է թեւերի երկու կողմերում առկա լիցքավորման պատյաններով, որոնք կարող են միաժամանակ լիցքավորել երկու մարտական ​​ինքնաթիռ:

Ավիաշոուի ժամանակ YY-20-ը օդային լիցքավորում է իրականացրել երկրի ամենաառաջադեմ գաղտագողի կործանիչ J-20-ին եւ J-16-ին միաժամանակ:

Ռազմական փորձագետ Ուանգ Մինջիի խոսքով՝ YY-20-ը Y-20 տրանսպորտային ինքնաթիռի արդիական տարբերակն է՝ ինքնամշակված վառելիքի լիցքավորման տեխնոլոգիայով, որը մեծացնում է օդային ուժերի մանեւրելու, հարձակվելու, պաշտպանելու եւ երկար հեռավորության վրա ինքնաթիռներ տեղափոխելու ունակությունը:

YY-20-ը կարող է տեղափոխել ավելի քան 100 տոննա վառելիք, որի կեսը կարող է օգտագործվել այլ ինքնաթիռների լիցքավորման համար:

Բացի ինքնաթիռների լիցքավորումից, YY-20-ը, Y-20-ի նման, կարող է գործել որպես անձնակազմի եւ բեռների տեղափոխման համար նախատեսված տրանսպորտային ինքնաթիռ՝ աջակցելով մարտական ​​ինքնաթիռներին: