Հնդկաստանում առնվազն 260 մարդ է ձերբակալվել երկրի զինվորականների հավաքագրման նոր քաղաքականության դեմ բողոքի ցույցերի ժամանակ. այդ մասին հունիսի 18-ին հայտնել է NDTV հեռուստաալիքը։
Ինչպես նշվում է, Ուտար Պրադեշ նահանգում ձերբակալվել է ավելի քան 250 ցուցարար։ Բողոքի ցույցերի ընթացքում հարյուրավոր երիտասարդներ ջարդել են երկաթուղային կայարանները և փակել մայրուղիները:
Ուրբաթ օրը Թելինգանա նահանգում բախումների ժամանակ ոստիկանները կրակ են բացել Սեկունդերաբադ քաղաքի երկաթուղային կայարանի ցուցարարների վրա։ Արդյունքում 24-ամյա երիտասարդ էր մահացել: Իշխանությունները խոստացել են նյութական օգնություն ցուցաբերել մահացածի ընտանիքին։
Նախկինում երիտասարդները զինվորական անձնակազմ էին մտնում 17,5-ից 21 տարեկանում՝ խիստ ընտրություն անցնելուց հետո, որից հետո ծառայում էին նվազագույնը 15 տարի։ Նրանք ունեին լավ աշխատավարձի և տարբեր նպաստների, ինչպես նաև զինվորականի և նրա ընտանիքի անդամների անվճար բուժօգնության իրավունք։ Թոշակի անցնելուց հետո նախկին զինվորականը ստանում էր մի շարք նպաստներ և ցմահ թոշակ։
Այս տարի Հնդկաստանի կառավարությունը հայտարարել է ընդունելության նոր կանոններ։ Զորակոչիկի տարիքը հասցվել է 23-ի, իսկ ծառայության ժամկետը կկազմի ընդամենը չորս տարի, որից հետո նախատեսվում է, որ լավագույն նորակոչիկների միայն 25%-ը կշարունակի ծառայությունը։ Մնացածը կազատվեն առանց նպաստի՝ միանվագ վճարով։