Այսօր՝ օգոստոսի 19-ին, խոշոր ավտովթար է տեղի ունեցել Գեղարքունիքի մարզում: Ժամը 15:00-ի սահմաններում Գեղարքունիքի մարզի բնակիչ 70-ամյա Նորայր Մ.-ն իր վարած Land Rover Defender մակնիշի ավտոմեքենայով Սևան-Մարտունի-Գետափ ավտոճանապարհի 7-րդ կմ հատվածում, դեպի Մարտունի ընթանալիս, դուրս է եկել ճանապարհի երթևեկելի գոտուց , բախվել ճանապարհի աջ կողմում գտնվող ջրատար խողովակի բետոնե պատնեշին և կողաշրջվել:

Ինչպես հայտնում է ֆոտոլրագրող Գագիկ Շամշյանը, վթարի հետևանքով վարորդ Նորայր Մ.-ն և ուղևոր, Գեղարքունիքի մարզի բնակիչ 66-ամյա Անահիտ Մ.-ն մարմնական վնասվածքներով տեղափոխվել են «Սևան» բժշկական կենտրոն:

Վթարի փաստով Հայաստանի Քննչական կոմիտեի Գեղարքունիքի մարզային քննչական վարչության Սևանի քննչական բաժնում նախաձեռնվել է վարույթ: