Այսօրվա շաբաթօրյակի ժամանակ դժբախտաբար ականատես եղանք նաև թմրամիջոցների օգտագործման արգասիքների՝ կաթուցիչներ, ներարկիչներ: Այս մասին իր ֆեյսբուքյան էջում գրել է ՔՊ-ական պատգամավոր, առողջապահության նախկին նախարար Արսեն Թորոսյանը:
«Վերջին ժամանակներս բոլորս շատ ենք խոսում այս աղետի ու դրա ահագնացող չափերի մասին։ Խոսում ենք կառավարությունում, ազգային ժողովում, ԶԼՄ-ներով, մեր բակերում և տներում։ Այս բանավեճի հիմնական ուղղությունը թմրամիջոցների ապօրինի շրջանառությունն է, ապօրինի ներհոսքը դեպի մեր երկիր, տելեգրամյան ալիքների և էլեկտրոնային դրամապանակների միջոցով վաճառքը։ Եվ բոլորս ակնկալում ենք, որ պետք է արդյունավետ պայքար մղենք վերը թվարկված հանցագործությունների դեմ և ճիշտ ենք մեր ակնկալիքների մեջ։
Դրանք վերաբերում են թմրամիջոցների առաջարկին, սակայն պակաս կաևոր չէ կամ միգուցե ավելի կարևոր է պայքարը դրանց պահանջարկի դեմ։ Այդ պայքարը պետք է ընդգրկի համապատասխան կրթությունը դեռ մանկական տարիքից և բուժումը այն դեպքերում, երբ արդեն առկա է կախվածություն։ Եկեք նաև խոսենք այս ամենի մասին։
Նման վնասակար սովորությունները գիտակցաբար մերժելուն միտված կրթությունը պետք է մեր երեխաներին տանք թե՜ դպրոցներում և այլ ուսումնական հաստատություններում, թե՛ ընտանիքներում։
Պետք է նաև չվարանենք խոսել օրինակ դեռահասների և երիտասարդների կողմից այլ տեսակի վնասակար նյութերի մեծացած օգտագործման մասին, ինչն էլ իր հերթին հանգեցնում է հետագայում ավելի հեշտ անցում կատարելուն թմրամիջոցների օգտագործմանը։ Բայց մենք սովորաբար չենք ուզում ուշադրություն դարձնել այդ կրկին ահազանգող թվերին, որովհետև այդ «այլ նյութերը» ավանդաբար ընդունված են մեր հասարակությունում։ Դրանք են ալկոհոլը և ծխախոտը»,-գրել է Արսեն Թորոսյանը: