Աննա Հակոբյանն այսօր մի բոցաշունչ գրառում է արել, որում իբրև թե նաև ներողություն է խնդրում: Գրառումը ներկայացնում ենք ստորև՝ որոշակի կրճատումներով.
«Երկու տարի առաջ մեր դեմ սանձազերծված անհավասար պատերազմի ընթացքում կանանց ջոկատ կազմեցի մեր զինվորի կողքին լինելու, նրան մենակ չթողնելու նպատակով։
Ջոկատին զինվորագրված կանանցից մի քանիսի որդիները ժամկետային զինծառայողներ էին՝ այսինքն կռվի դաշտում, մի քանիսը զինվորագրվել էին իրենց եղբայրների փոխարեն, որոնք տարբեր պատճառներով չէին գնացել այդ քայլին։
...Այսպես, տարբեր մոտիվացիաներով զինվորագրված կանանց ջոկատ՝ անվանակոչված մ.թ.ա. 8-5-րդ դարերի Հայոց թացուհի Էրատոյի անունով։
Այսօր, 44-օրյա պատերազմից երկու տարի անց ես ուզում եմ ներողություն խնդրել իմ ջոկատի բոլոր կանանցից այս երկու տարում իրենց հետ կատարվածի համար։ Այդ կանայք բոլորը անարգանքի սյունին գամվեցին, քարկոծվեցին, պատվազրկվեցին, ծաղրի, ատելության, ամոթանքի ենթարկվեցին, հետապնդվեցին՝ ոմանց աշխատանքից ազատեցին, ոմանց ուսումից։ Ես ներողություն եմ խնդրում նրանցից, որ պատճառ եղա, որպեսզի նրանց մեկ օրվա մեջ դարձնեն «շարքային անբարոյականներ»։
Ես դարերի հեռավորությունից ներողություն եմ խնդրում իմ նախնուց՝ Էրատո թագուհուց, որ նրա անունը մեկ օրվա մեջ դարձավ շարքային հայհոյանք»... մնացյալը, ցանկության դեպքում, հարկ է կարդալ տիկնոջ ֆեյսբուքյան էջում:
Այս գրառումը չէր կարող աննկատ մնալ սոցիալական ցանցի տիրույթում: Եվ, մասնավորապես, պատմական փաստերի անճշտության մասով:
Այդպես, Նարեկ Մալյանը գրում է.
«Նույնիսկ չգիտեմ ոնց ասեմ, որ տիկինը 5-րդ դասարանի պատմության դասագիրք չի բացել:
Էրատո թագուհին չէր կարող 300 տարի՝ ՄԹԱ 8-5-րդ դարերում թագավորել, քանի որ ծնվել է դրանից 800 տարի հետո՝ ՄԹԱ 1-ին դարում, ավելին՝ 300 տարի աշխարհում որևէ մեկը չի թագավորել, նույնիսկ այդքան չի ապրել:
Էրատոն հայոց գահին հասավ դրսի ուժերի կողմից կազմակերպված ապստամբության շնորհիվ, սակայն կառավարեց շատ կարճ: Սրանով վերջանում է Աննա Հակոբյանի և Էրատո թագուհու միջև նմանությունը»,- գրել է Մալյանը:
Հակոբ Կարապետյանն էլ գրում է.
«Կամավորական ջոկատ կազմելն իհարկե դրվատանքի արժանի քայլ է։ Հատկապես կարեւոր է այն առումով, որ դրանով խրախուսվում է կանանց մասնակցությունը հանրային գործերին։
Այդուհանդերձ, խնդրում եմ օգտագործել առիթն ու պատմել, ինչպես եւ ինչու ջոկատի անունը որոշվեց դնել Էրատո։ Մասնավորապես, ինչով է հիշատակման արժանացել առաջին դարում՝ Արտաշիսյան արքայատոհմի մայրամուտին մի քանի տարի կառավարած Էրատո թագուհին (ենթադրաբար նրա պատվին է ջոկատը անվանակոչվել), հատկապես, որ պատմության դասագրքերից տեղեկանում ենք, որ նա ըստ էության կայսրության դրածոն էր եւ կամակատարը։
Որքանով է այդ պատմական կերպարը համապատասխանում մերօրյա պայքարի համատեքստին։ Արդյո՞ք թագուհու անվան հետ հետ կապված հնարավոր ասոցիացիաները հաշվի առնվել են, արդյո՞ք անվանակոչության ուրիշ տարբերակներ քննարկվել են»,- գրել է նա հենց Հակոբյանի գրառման տակ: