Պարոն Ղուկասյանը այս պահին քնած է, ես էլ ճամփին եմ, գալիս եմ Երեւան, դեռ չեմ տեսել, թե ինչ է եղել, ոչ էլ Վարդան Ղուկասյանը․ MediaHub-ի հետ զրույցում ասաց «Հանրային ձայն» կուսակցության նախագահ Արտակ Գալստյանը՝ անդրադառնալով «Հանրային ձայն» կուսակցության փաստաբանական գրասենյակի վրա այսօր տեղի ունեցած հարձակման դեպքին։
Նշենք, որ այսօր Երեւանում անհայտ անձը կամ անձինք հարձակվել են Նոր Նորք վարչական շրջանի Գայի պողոտա 2 հասցեում գործող «Հանրային ձայն» կուսակցության փաստաբանական գրասենյակի վրա՝ սպիտակ ներկ լցնելով գրասենյակի պատերին, դռան մոտ կայանված ավտոմեքենայի վրա։ «Հանրային ձայն» կուսակցության պատվավոր նախագահը «Դոգ» մականվամբ հայտնի Վարդան Ղուկասյանն է։
Արտակ Գալստյանը դեպքը պայմանավորում է իրենց քաղաքական գործունեությամբ։ Ասում է՝ Վարդան Ղուկասյանը բավականին ինֆորմացված մարդ է, շատ արագ կպարզի։
«Արդեն մոտ ենք։ Ում անունը հիմա տվեցի, մինչեւ իրիկուն կմեռնի։ Որպեսզի չճշտված տեղեկություն չտամ, սպասենք մինչեւ կհստակեցվի, թե ով է արել։ Վստահ կարող եմ ասել, որ Վարդան Ղուկասյանի եւ Արտակ Գալստյանի քաղաքական գործունեության պատճառով է։ Իմ կենսագրությունը իմացող մարդը պիտի անասուն լինի, որ ցանկանա սենց բաներով վախեցնել։ Փորձում էին պրովոկացիա սարքել, չստացվեց»,-նշեց Գալստյանը։
Լիա Սարգսյան