Գիտնականները պարզել են, որ տղամարդկանց ճաղատացումը կարող է պայմանավորված լինել սխալ սննդակարգով։ Մասնագետների հետազոտությունը ցույց է տվել, որ նման խնդրի կարող է հանգեցնել մեծ քանակությամբ քաղցր ըմպելիքների գործածությունը, գրում է doctor.rambler.ru-ն։
Հետազոտությանը մասնակցել է 18-45 տարեկան 1951 տղամարդ։ Բոլոր կամավորները հատուկ հարցաթերթիկներ են լրացրել՝ պատասխանելով իրենց ֆիզիկական ու հոգեբանական առողջության վերաբերյալ հարցերին։ Արդյունքում գիտնականները հայտնաբերել են, որ շաքար պարունակող ըմպելիքների չարաշահման ու տղամարդկանց ճաղատացման միջև կա կապ։ Ընդ որում՝ հետտրավմատիկ սթրեսային խանգարումն էլ ավելի էր խթանում մազաթափությունը։
Գիտնականները եկել են այն եզրահանգման, որ շաքարի մեծ քանակությունը խթանում է այն ռեակցիաները, որոնց արդյունքում մազերի ֆոլիկուլները չեն ստանում բավարար քանակությամբ գլյուկոզա։ Դրա հետևանքով մազը ինչպես հարկն է չի սնուցվում և մահանում է
Այնուամենայնիվ հարկավոր է հաշվի առնել, որ հետազոտությունն անցկացվել է որոշակի սահմանափակումներով, քանի որ մասնակիցներից ոչ բոլորն են ունեցել բժշկի կողմից հաստատված ախտորոշում։ Սա է պատճառը, որ վերջնական արդյունքը դեռ հարկավոր է վերստուգել ու հաստատել տևական փորձարկումների արդյունքում։