Մի քանի օր է, ինչ լուրեր են շրջանառվում, թե Հայաստանի և Արցախի իշխանությունները պատրաստվում են Քաշաթաղի շրջանի Աղավնո գյուղը հանձնել թշնամուն։ Նշվում է նաև, որ այս հարցը քննարկելու համար Արցախի նախագահ Արայիկ Հարությունյանը մեկնել է Մոսկվա։ Թեմայի շուրջ MediaHub.am-ը զրուցել է Աղավնոյի համայնքապետ Անդրանիկ Չավուշյանի հետ։ Նրա խոսքով՝ այս հարցի շուրջ պաշտոնական որևէ հաղորդագրություն չկա։
«Էնպես չի, որ մեր իշխանությունները լավ բաներ են արել կամ անում, դրա համար էլ ժողովուրդն ամեն փոքր լուր վատ ձևով է մեկնաբանում։ Ժողովուրդն իրեն անտեր է զգում, քանի որ իշխանությունից որևէ արձագանք չկա»,- ասաց նա։
Ըստ Անդրանիկ Չավուշյանի՝ գյուղում մտահոգություն կա, բայց մարդիկ մարտական են տրամադրված։ Ինչ վերաբերում է Արայիկ Հարությունյանի՝ Մոսկվա այցի մասին լուրերին, ապա Աղավնոյի համայնքապետն ասաց, որ որևէ լուր չունի այդ մասին։
«Ոչ մեկ չի կարող մեզ ասել, որ գնանք մեր գյուղից, իրենց ինչի՞ տեղ են դրել»,- նշեց նա։
Անդրանիկ Չավուշյանն ասաց, որ սա կարող է հերթական քայլը լինի թշնամու կողմից՝ Արցախում խուճապ տարածելու համար։
«Թող պաշտոնապես մի բան ասեն ու մեզնից արձագանք կստանան։ Հիմա անպատասխանատու հայտարարություններ են անում, բայց մենք իշխանությունից հստակ արձագանք ենք սպասում։ Հստակ է մի բան, որ մենք հաստատակամ ենք, գյուղը չենք լքելու»,- շեշտեց Աղավնոյի համայնքապետը։
Մերի Գևորգյան