Hraparak.am-ը զրուցել է ԱԺ «Պատիվ ունեմ» խմբակցության ղեկավար, «Դիմադրություն» շարժման լիդերներից Արթուր Վանեցյանի հետ։

- Պարոն Վանեցյան, այսօր մայիսի 9-ն է, և եթե ոչ պաշտոնապես, ապա խոսակցությունների մակարդակում հայտարարվում էր, թե մայիսի 9-ին Նիկոլ Փաշինյանը հրաժարական է տալու, քանզի մայիսի 9-ը վերջնաժամկետն է։ Ի՞նչ է սպասվում մեզ այսօր՝ մինչև օրվա վերջ։

- Նման պնդումներ մենք չենք իրականացրել երբևէ, շարժման առաջնորդները երբեք ժամկետներ չեն դրել, մենք ասում ենք, որ սա պայքար է, և այդ պայքարը տևելու է այնքան, ինչքան հարկ լինի, որ այս իշխանություններից ազատվենք, որովհետև հայրենիքի համար պայքարը ժամկետներ չի հարցնում, պետք է ուղղակի զինվենք համբերությամբ և պայքարենք։ Մենք հասկանում ենք, որ այս իշխանությունները կառչած են իրենց աթոռներից և ամեն ինչ անելու են, որպեսզի մնան։ Մենք էլ պետք է ամեն ինչ անենք, որ ժողովրդի ճնշման ներքո այս իշխանությունները հեռանան։ 

- Բայց ժողովրդի ճնշումը դեռ չենք զգում, այսօր հրապարակում որքան մարդ, որ հավաքվել է, դրանից ավել դեռ չեք կարողացել հավաքել։

- Ես Ձեզ հետ համաձայն չեմ, որովհետև այդ ճնշումը կա, եթե այդ ճնշումը չլիներ, էս հարցերը հիմա չէին առաջանա, եթե այդ ճնշումը չլիներ իշխանությունները չէին փորձի ոստիկանական ուժերով զսպել, կասեցնել այս պայքարը, չէին փորձի տարբեր սադրիչների միջոցով կազմակերպել սադրանքներ, չէին փորձի խանգարել ընդդիմության՝ այս թափ հավաքող շարժմանը։ Ճնշումը կա, շարժումը թափ է հավաքում, և համոզված եմ՝ ամեն ինչ շատ լավ է լինելու։

- Ձեզ քննադատում են, որ մայիսի 1-ից սկսած՝ արդեն իններորդ օրն է, որ հանրահավաքներ եք անում, բայց դեռ չեք ներկայացրել հստակ ծրագիր, չունեք հստակ տեսլական և չունեք հստակ լիդեր, որ մարդիկ իմանան՝ ում հետևից են գնում և հետո ինչ է լինելու։

- Այդ քննադատությունը որոշ չափով արդարացի է և տեղին, բայց թույլ տվեք՝ մենք ժամկետները որոշենք, թե երբ ենք այդ ծրագրերը ներկայացնելու։ Մենք ասել ենք, որ սա պայքար չէ իշխանության համար, պաշտոնի համար։ Էստեղ աթոռակռիվ չէ։ Դրա համար հիմա վեր կենալ և հայտարարել՝ ով է շարժման լինդերը․․․ շարժման լինդերը յուրաքանչյուրն է, մեզանից յուրաքանչյուրը կարող է դառնալ շարժման լիդեր։ Բայց, այո, նորից եմ կրկնում՝  Ձեր հարցը, որը պարունակում է նաև քննադատություն, տեղին է, և առաջիկա ժամանակներում այդ հարցերի պատասխանները կստանաք։

- Լիդերի հարցում պայքար ու խնդի՞ր կա ձեր միջև, քանզի նման խոսակցություններ կան, որ պայքար է գնում, թե ով պետք է լինի լիդերը՝ Դո՞ւք, Իշխան Սաղաթելյա՞նը, Ռոբերտ Քոչարյա՞նը, թե՞ մեկ ուրիշը։

- Ընդհանրապես նման բան չկա։ Ուզում եմ նաև հայտարարել, որ թե՛ ես, թե՛ Սաղաթելյանը բազմիցս հայտարարել ենք, որ պատրաստ ենք ընդհանրապես իշխանափոխությունից հետո չզբաղեցնել որևէ պետական պաշտոն։ Այս պայքարում պարաստ ենք կանգնել թե՛ առաջնագծում, թե՛ մեջտեղում, թե՛ հետևի շարքերում։ Ես իմ մասով հստակ ասում եմ, որ ես պայքարում եմ բացառապես մեր հայրենիքի անվտանգության ապահովման համար:

- Այսինքն՝ դուք հիմա պաշտոնապես հայտարարո՞ւմ եք, որ թե՛ Դուք, թե՛ Իշխան Սաղաթելյանը որևէ պաշտոնի հավակնություն չունեք և որևէ պաշտոն չեք զբաղեցնի, եթե իշխանափոխություն լինի։

- Մենք չենք ասում, որ չենք զբաղեցնի, մենք ասում ենք՝ պատրաստ ենք, եթե նման հարց քննարկվի, մենք՝ ինքներս, հրաժարվենք, բայց իշխանափոխությունից հետո՝ ով ուր կգնա, ինչ կանի, կորոշեն բոլորը։ Ես ասում եմ՝ մենք չենք կռվում պաշտոնների համար, և համոզված եմ՝ նաև ընդդիմության մաս կազմող մյուս ուժերից որևէ մեկը պաշտոնի համար չի պայքարում, ես դա հստակ ասում եմ։ Իսկ ինչ կլինի իշխանափոխությունից հետո, ես ասել եմ, որ մեր պետության հիմքերը խարխլված են, և վաղը եթե այս իշխանությունները գնան, բոլոր բանիմաց մարդիկ, բոլոր այն ուժերը, բոլոր այն մասնագետները, այդ թվում՝ սփյուռքի ներկայացուցիչները պետք է լծվեն աշխատանքի և փորձեն վերականգնել մեր պետությունը։

- Դուք ասացիք՝ պաշտոնի չեք հավակնում, բայց մյուս կողմից նշեցիք, որ իշխանափոխությունից հետո գուցե նաև հավակնեք, ճի՞շտ հասկացա։

- Տեսեք, ես չեմ ասում՝ ես չեմ հավակնում պաշտոնի, ես ասում եմ՝ ես չեմ պայքարում պաշտոնի համար։ Եթե նման խնդիր դրվի, օրինակ՝ հանրության կողմից ասվի, որ «մենք դուրս կգանք փողոց, կպայքարենք, բայց պետք է Արթուր Վանեցյանը պաշտոն չզբաղեցնի» կամ ընդդիմադիր մյուս ուժերը որոշեն, որ այս պայքարի արդյունքում ես պետք է որևէ պաշտոն չզբաղեցնեմ, ես պատրաստ եմ հրաժարվել։ Բայց նաև կարող եմ ասել հակառակը, որ եթե որոշվի, որ պետք է իմ գիտելիքները, փորձը օգտագործվի, նաև մեր քաղաքական ուժի ներկայացուցիչները պետք է ապագա կառավարության մեջ որևէ դերակատարում ունենան, բոլորը պատրաստ են այդ պատասխանատվությունը ստանձնել։

- Այսինքն՝ առաջիկայում հնարավո՞ր է հայտարարվի ինչպես ընդդիմության ծրագրերի, այնպես էլ շարժման լիդերի մասին:

- Շարժման լիդերի մասին չեմ իմանում՝ կհայտարարվի, թե չէ, որովհետև ի սկզբանե հայտարարվել է, որ սա համազգային շարժում է՝ առանց առաջնորդների, առանց կուսակցական դրոշների, ուստի լիդերի մասին այս պահին կդժվարանամ պատասխանել, իսկ ծրագրերի մասին առաջիկայում կհայտարարվի։