Իրենից որևէ նոր բան ես չեմ սպասում, որովհետև երբ ժողովրդի մոտ ընդվզում է լինում կամ դժգոհության ալիք, նա անմիջապես գնում է Նիկոլ Փաշինյանի հետ հանդիպելու ու նորից փափուկ բարձը դնում ժողովրդի գլխի տակ: Այդ իսկ պատճառով ես նույնիսկ չեմ էլ լսել նրա հարցազրույցը, քանի որ այն լինելու էր հենց այդ ոճի մեջ: Այս մասին MediaHub-ի հետ զրույցում ասաց Արցախի ԱԺ պատգամավոր Մետաքսե Հակոբյանը՝ անդրադառնալով Արայիկ Հարությունյանի երեկ տված հարցազրույցին ու դրանում հնչեցրած հայտարարություններին:
Մետաքսե Հակոբյանը նշեց, որ վերջին հանդիպումից հետո Արայիկ Հարությունյանն ասել է՝ «չգիտենք ինչ, բայց մի բան կանենք».
«Այսինքն պատկերացնո՞ւմ եք, հայկական երկու պետությունների ղեկավարների մեկշաբաթյա դեգերումները, հանդիպումները մեկ նախադասության մեջ են տեղավորվում՝ չգիտենք ինչ անել, բայց ինչ-որ բան անելու ենք: Սա է, և հասկանում ես, որ իրենք ոչինչ էլ չեն անելու և գնում են այն օրակարգով, որը Փաշինյանն է գծել»-ասաց նա:
Իսկ դա, շարունակեց պատգամավորը, այն է, ինչ վերջերս անընդհատ նետվում է դաշտ՝ «Արցախը տանք Հայաստանը փրկենք».
«Այստեղից էլ լսում ենք՝ եկեք գործ չունենանք Հայաստանի, ինչ ուզում են թող անեն, մենք էլ ռուսների միջոցով Արցախը փրկենք: Եվ եթե հստակեցնենք այդ երկուսի առանձին գործողություններն ու պայմանավորվածությունները, ապա ստացվում է, որ Փաշինյանն ու Հարությունյանը որոշել են հետևյալը. Նիկոլը տա Արցախը, փրկի Հայաստանը, թեև Թուրքիայից ու Ադրբեջանից եղան հստակ ազդակներ, որ իրենք դրանով չեն բավարարվելու և հստակ ասվեց, թե ինչ է դրանից հետո սպասվում: Իսկ Արցախի նախագահն էլ, փաստորեն, ասում է՝ մենք գործ չունենք, ՀՀ-ում ինչ անում են, թող անեն, այսինքն դրանով համաձայնություն տալով Նիկոլի գործողություններին, իսկ Արցախն էլ միանա Ռուսաստանին և այդպես փրկվենք: Բայց կարող եմ հստակ մի բան ասել. Արցախն ու Հայաստանը կա՛մ փրկվելու են միասին, կա՛մ կործանվելու են միասին: Սա է իրողությունը. Հայաստանն առանց Արցախի չի կարող առանձին դիտարկվել, Հայաստանին մաս-մաս են անելու, բզկտելու են նույն րոպեին, եթե Արցախի հիմնախնդիրը փակվեց»,- շեշտեց մեր զրուցակիցը:
Պատգամավորը վստահ է՝ այս ամենով Փաշինյանն իր իշխանության կյանքն է երկարացնում, անկախ նրանից, թե որքա՞ն կտևի այդ ժամանակահատվածը: Եվ այդ պատճառով էլ, ընդգծեց նա, այդ ժամանակը հնարավորինս ձգում են.
«Տեսեք, այսպես կոչված Զանգեզուրի միջանցքը Ադրբեջանը պահանջում էր դեռ գարնանը և շատ հստակ էր այդ պահանջը դրված: Եվ ի՞նչ արեց. շատ շտապ պայմանավորվեցին, որ Բերձորը, Աղավնոն, Ներքին Սուսը հանձնեն, դրա դիմաց որոշակի ժամանակ շահեն: Այդպես մաս-մաս են անում, մինչև վերջում փաթեթով… բայց Արցախից արդեն բան էլ չի մնացել տալու: Իրենց համար այդ ժամանակը պաշտոնավարելն էլ է հերիք և նաև իրենց ֆիզիկական փրկության ճանապարհն են այս ընթացքում փրկում, գուցե նաև արդեն գտել են՝ պատահական չեն այդ դեգերումները դեպի Արևմուտք»,- ասաց նա:
Հակոբյանը հիշեցրեց, որ դեռ երկու տարի առաջ Արցախի այս ճակատագիրը անհավատալի էր թվում, հիմա էլ նույնը Հայաստանի դեպքում է՝ ապագան անհայտ է.
«Այնպես որ սպասել այս երկու անձերից, որ նրանք փրկելու են կամ փրկության ճանապարհներ են փնտրում Արցախի ու Հայաստանի համար մեղմ ասած միամտություն է»,- հավելեց Մետաքսե Հակոբյանը: