Այն միտքը, որ Ուկրաինայի նախագահը կարող է ռազմական ճանապարհով վերադարձնել Ղրիմը, ուղղակի անհեթեթ է։ Այս մասին գերմանական Stern պարբերականին տված հարցազրույցում ասել է նախկին կանցլեր Գերհարդ Շրյոդերն անցյալ շաբաթ Մոսկվա կատարած այցից հետո, որի ընթացքում նա հանդիպել է ՌԴ նախագահ Վլադիմիր Պուտինի հետ։

Նա կրկին կոչ է արել բանակցություններ վարել Պուտինի հետ՝ հայտարարելով. «Լավ նորությունն այն է, որ Կրեմլը ցանկանում է բանակցությունների միջոցով լուծում գտնել»:

Շրյոդերը ենթադրել է, որ ՄԱԿ-ի եւ Թուրքիայի միջնորդությամբ Սեւ ծովի ուղիները բացելու գործարքը կարող է հիմք հանդիսանալ հրադադարի համար, եւ ասել է, որ երկու կողմերը կհամաձայնեն զիջումների՝ պատերազմը դադարեցնելու համար:

Նա ասել է, որ «մեծ սխալ» կլինի ժամանակից շուտ անտեսել Ուկրաինայի հնարավոր զիջումները՝ որպես «թելադրված խաղաղություն»: Նրա խոսքով՝ խնդիրները կարող են լուծվել Դոնբասի արեւելյան շրջանի փոխզիջման միջոցով՝ «շվեյցարական կանտոնի մոդելի» հիման վրա, ինչպես նաեւ Ուկրաինայի համար «զինված չեզոքության»՝ որպես ՆԱՏՕ-ին անդամակցության այլընտրանք։

Նրա կարծիքով՝ Ուկրաինան պետք է հրաժարվի Ղրիմի նկատմամբ իր հավակնություններից: «Այն միտքը, որ Զելենսկին ռազմական ճանապարհով կվերագրավի Ղրիմը, ուղղակի անհեթեթ է»,- ասել է նա:

Նա նաեւ Գերմանիայի կառավարությանը կոչ է արել վերանայել իր դիրքորոշումը «Հյուսիսային հոսք 2» գազատարի վերաբերյալ։ «Եթե չեք ցանկանում օգտագործել «Հյուսիսային հոսք 2»-ը, ապա պետք է կրեք դրա հետեւանքները։ Իսկ Գերմանիայի համար դրանք նույնպես հսկայական կլինեն»,- ասել է նա Շտերնին: «Եթե ամեն ինչ իսկապես վատ գնա, կա այս խողովակաշարը, եւ «Հյուսիսային հոսք»-ի երկու գազատարներով էլ գերմանական արդյունաբերության եւ գերմանական տնային տնտեսությունների հետ կապված մատակարարման խնդիրներ չեն լինի»:

Նախկին կանցլերը նշել է, որ Գերմանիան եւ Ֆրանսիան հատուկ պատասխանատվություն են կրում Ուկրաինայում պատերազմի ավարտի համար։ «Այս պահին այդ ճակատում քիչ բան է արվում, դա իմ տպավորությունն է,- ասել է նա:- Որովհետեւ պարզ է, որ առանց բանակցությունների ոչինչ չի ստացվի»։