Մոտ մեկ ժամ առաջ հարաբերական անդորր էր, խաղաղ էր, ոչ մի կրակոց չկար, սակայն մոտ 10 րոպե առաջ Սոթքի ուղղությամբ էլի կրակոցներ սկսվեցին։ Այս մասին այսօր MediaHub-ին փոխանցեց Վարդենիս խոշորացված համայնքի ղեկավար Ահարոն Խաչատրյանը։
«Վարդենիսում հիմա համեմատաբար խաղաղ է։ Զոհեր, վիրավորների թիվ այս պահին չեմ կարող ասել, բայց և՛ զոհեր ունենք, և՛ վիրավորներ»,-փոխանցեց Խաչատրյանը։
Հիշեցնենք, որ ժամը 14։00-ի դրությամբ իրադրությունը հայ-ադրբեջանական սահմանագծի որոշ հատվածներում շարունակում է ծայրահեղ լարված մնալ: Չնայած հրետակոծության ինտենսիվության զգալի թուլացմանը՝ հակառակորդը շարունակում է դիրքային առաջխաղացման փորձերը, մասնավորապես՝ Ներքին Հանդի, Վերին Շորժայի, Արտանիշի և Սոթքի ուղղությամբ։
Հայաստանի Հանրապետության զինված ուժերի ստորաբաժանումները շարունակում են ողջ ծավալով կատարել իրենց առջև դրված մարտական խնդիրները: Ադրբեջանական լայնածավալ ագրեսիայի հետևանքով զոհերի նախնական թիվը՝ 49, արդեն հրապարակվել է հանրապետության վարչապետի կողմից։ Տվյալների լիարժեք ճշտումներից հետո պաշտպանության նախարարությունը լրացուցիչ տեղեկություններ կհայտնի զոհերի և վիրավորների թվի մասին:
Լիաննա Թորոսյան