Եվրամիության դիվանագիտության ղեկավար Ժոզեպ Բորելը շնորհակալություն է հայտնել ՄԱԿ-ին եւ Թուրքիային ցորենի գործարքում Ռուսաստանի վերադարձին աջակցելու համար։
Դիվանագետն ընդգծել է, որ պարենը երբեք չպետք է դառնա «պատերազմի զենք»։
«Ցորենի արտահանումը չափազանց կարեւոր է համաշխարհային պարենային ճգնաժամին դիմակայելու համար... Բոլոր կողմերին կոչ ենք անում երկարացնել նախաձեռնության գործողությունը»,- գրել է Բորելը Թվիթերի իր էջում։
Հոկտեմբերի 29-ին ՌԴ ԱԳՆ-ն հայտարարել էր այն մասին, որ Ռուսաստանը դադարեցնում է մասնակցությունը ցորենի գործարքին։ Ռուսաստանի պաշտպանության նախարարության տվյալներով՝ Ուկրաինայի զինված ուժերը, հումանիտար միջանցքի քողի ներքո, որն ստեղծվել է ուկրաինական գյուղմթերքները դուրս բերելու համար, անօդաչուների հարձակումներ են իրականացրել ՌԴ Սեւծովյան նավատորմի Սեւաստոպոլում գտնվող նավերի եւ ենթակառուցվածքի դեմ։
Նոյեմբերի 2-ին Ռուսաստանը վերադարձել է ցորենի գործարքին՝ Ուկրաինայից գրավոր երաշխիքներ ստանալով այն մասին, որ ցորենի միջանցքը չի օգտագործվի Մոսկվայի դեմ ռազմական գործողություններ վարելու համար։ ՌԴ պաշտպանության նախարարությունում հայտարարել են, որ այս որոշմանը նպաստել են Թուրքիան եւ ՄԱԿ-ը։