Մենք պետք է համախմբվենք եւ կարողանանք դրածո իշխանություններին մեր երկրից հեռացնել․ MediaHub-ի հետ զրույցում ասում է ԵՊՀ արեւելագիտության ֆակուլտետի պրոֆեսոր, Արցախի Հանրապետության պաշտպանության բանակի գնդապետ, «Գուրգեն Մելիքյանի» Քաշաթաղի բազմազավակ ընտանիքների հիմնադրամի գործադիր-տնօրեն Գուրգեն Մելիքյանը։

«Ճիշտ է՝ դժվար ժամանակներ ենք ապրում, բայց վստահորեն ասում եմ՝ հաղթելու ենք, եւ հաղթանակը մերն է լինելու։ Մենք այդ ուժն ունենք, այդ ներուժը կա մեր մեջ, մեր ժողովրդի մեջ։ Ամեն ինչ թողնելու ենք մի կողմ ու համախմբվենք։ Գիտնական, մշակութային գործիչ, ստեղծագործող , արվեստագետ, գրող, բոլորս միասին, միահամուռ կկարողանանք քշել թուրքամետ իշխանություններին»,-ասում է նա՝ ընդգծելով՝ եթե կարողանանք, այդ ուժը կգտնենք մեր մեջ, ունենք այդ հնարավորությունը։

Շեշտում է՝ այն մարդիկ, ովքեր կարծում են, թե ամեն ինչ կորցրել ենք, սխալվում են․

«Մեր ժողովրդի ուժի դեմ է այս պայքարը։ Էս ժողովրդի զորության դեմ է»։

Արցախյան բանակի գնդապետը Լաչինի միջանցքի փակման պատճառների հիմքում տեսնում է Հայաստանի իշխանությունների, մասնավորապես` Նիկոլ Փաշինյանի թրքասիրությունը. «Որովհետեւ, երեք թրքամետ ղեկավարներ՝ Փաշինյանը, Էրդողանն ու Ալիեւը պայմանավորվել են։ Նրանք որոշել են կոտրել հայկական դիմադրությունը, հայկական ողնաշարը։ Չի լինելու դա։ Այս ճանապարհը կբացեն՝ ուզեն, թե չուզեն»,-նշեց նա։

Արցախով ապրող մարդ է Գուրգեն Մելիքյանը, իր ապրումներն այսպես է մեկնաբանում. «Արցախցիներն իմ բարեկամներն են, ես սիրահարված եմ այդ ժողովրդին։ Ես սիրահարված եմ այդ կայուն, տոկուն ժողովրդին։ Իրենց վերջին կտոր հացը կդնեն հայոց սեղանին, բայց չեն հանձնվի։ Շատ երկար կարող են դիմանալ։ Մենք կարող ենք երկար դիմանալ, բայց երկար չի տեւելու այս իշխանությունների կյանքը, նրանք պետք է գնան՝ վստահեցնում եմ Ձեզ։ Ես չեմ կարող բառերով բացատրել այն ցավը, որ հիմա զգում եմ։ Իմ կենսակերպը Արցախով ապրելն է, իմ կենսակերպը Մոնթեի կարգախոսը կրելն է. «Եթե կորցնենք Արցախը, կշրջենք մեր պատմության վերջին էջը։ Իմ կենսակերպը Լեոնիդ Ազգալդյանի խոսքն է. «Սա Հայաստան է եւ վերջ», իսկ մենք պարտավոր ենք պահել Հայաստանը»,- ընդգծեց նա։

Հիշեցնենք, որ Ադրբեջանը դեկտեմբերի 12-ից շարունակում է փակ պահել Արցախը Հայաստանին կապող միակ ճանապարհը։ Արցախը փաստացի կանգնել է հումանիտար աղետի շեմին։ 1100 արցախցի, որոնցից 270-ը՝ անչափահաս, տուն վերադառնալու հնարավորություն չունի:

Ավելի վաղ հայտնել էինք, որ մի խումբ արցախցիներ Ստփանակերտից երթով գնացել էին ռուս խաղաղապահների հետ բանակցելու։ Վերջնարդյունք դեռ չկա, քանի որ քաղաքացիները մինչեւ հիմա այնտեղ են։ 

Լիա Սարգսյան