Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, այսօր հրապարակեց «Նորքի զինված խմբի» գործով դատավճիռը, որի համաձայն Արթուր Վարդանյանին դատապարտեց 13 տարի ժամկետով, Անտոն Թոթոնջյանին՝ 9 տարի ժամկետով, սակայն կիրառեց փորձաշրջան, իսկ Վահան Շիրխանյանը համաներմամբ ազատ արձակվեց։
Հիշեցնենք, որ «Նորքի զինված խմբի» գործով 20 անձ էր անցնում։ Արթուր Վարդանյանը, որն, ըստ մեղադրանքի, համարվում է զինված խմբի պարագլուխը, մեղավոր ճանաչվեց առաջադրված մեղադրանքում, դատապարտվելով ազատազրկման՝ 13 տարի ժամկետով: Հաշվակցելով նախաքննության և դատաքննության ընթացքում կալանքի տակ գտնվելու ժամկետը, վերջնական պատիժ սահմանվեց 9 տարին։
Իսկ ՀՀ ՊՆ նախկին նախարար Վահան Շիրխանյանին ՀՀ քրեական օրենսգրքի 223-րդ հոդվածի 2-րդ մասով և 235-րդ հոդվածի 3-րդ մասով առաջադրված մեղադրանքներում դատարանն արդարացրեց՝ ճանաչելով և հռչակելով նրա անմեղությունը՝ հանցակազմի բացակայության հիմքով, իսկ մյուս մեղադրանքներով մեղավոր ճանաչեց՝ որպես վերջնական պատիժ սահմանելով ազատազրկումը 3 տարի 5 ամիս ժամկետով։
Դատարանը Վահան Շիրխանյանին համաներմամբ ազատեց պատժի կրումից։
Ընդգծենք, որ ըստ գործի նյութերի՝ Արթուր Վարդանյանին մեղադրանք է առաջադրվել այն բանի համար, որ նա 2015թ. ապրիլից գտնվելով Հայաստանի Հանրապետության տարածքում, ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել, պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր նպատակ ունենալով Հայաստանի Հանրապետությունում իշխանությունը յուրացնել, այսինքն զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել նրա կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից:
Լիաննա Թորոսյան