«Զվարթնոց» միջազգային օդանավակայանը հանդիսանում է ոչ միայն ՀՀ ամենամեծ օդանավակայանը, այլ նաև վերջին ժամանակներում ձեռք է բերել բազմաթիվ տրանզիտային թռիչքների համար հարմար օդանավակայանի համբավ։
Եթե դեռ մի քանի տարի առաջ հազվադեպ էին տրանզիտային թռիչքները «Զվարթնոց» օդանավակայանից և զբոսաշրջիկների մեծաքանակ հոսք չկար, ապա այժմ ՀՀ օդանավակայանում տեսանելի է՝ ժամանողների 50%–ը ՀՀ քաղաքացիներ չեն։
Բայց ինչո՞վ է մեր օդանավակայանը տարբերվում մյուս միջազգային օդանավակայաններից: Օրինակ, գրեթե բոլոր օդանավակայաններում անձնագրի ստուգման հատվածը բաժանված է լինում մի քանի գոտիների՝ տվյալ երկրի քաղաքացիների և այլ երկրների քաղաքացիների անձնագրերի ստուգման համար: Շատերս ենք նկատել, որ Շենգենյան գոտու երկրների օդանավակայաններում ԵՄ երկրների, ԱՄՆ քաղաքացիների, Իսրայելի և Կանադայի քաղաքացիների համար առանձնացված հատվածներ են գործում, իսկ մյուս բոլոր երկրների անձնագրեր ունեցողները անցնում են մեկ այլ հատվածով։
Հերթական անգամ հայրենիք վերադառնալիս և «Զվարթնոց»-ում նույն նվաստացուցիչ իրավիճակին հանդիպելիս նկատեցինք՝ ՀՀ քաղաքացու անձնագիրը ոչ մի երկրում չունի առավելություն, և որքան էլ դա ցավալի է, անգամ մեր սեփական երկրում է այդպես։
Երբ ՀՀ քաղաքացիները վայրէջք են կատարում այլ երկիր, ժամերով հերթ են կանգնում, որ անձնագրում կնիք դնեն, և մուտք գործեն տվյալ երկիր։ Նույնը՝ մեզ մոտ. ՀՀ ժամանելիս Հայաստանի անձնագիր ունեցողները չունեն ոչ մի առավելություն և երբ իջնում են «Զվարթնոց» օդանավակայան, ապա իրենց հողում իրենց հանդիպում է մի մեծ հերթ, որը նրանք կիսում են տարբեր երկրների քաղաքացիների հետ և ժամերով մնում են այդ հերթի մեջ: Այո, տևական ժամանակ է, ինչ այդ հերթի մեծ մասը ոչ միայն ՀՀ քաղաքացիներն են, այլ զբոսաշրջիկներ, միգրանտներ, և սա շատ լավ է ՀՀ տնտեսության համար: Բայց արդյո՞ք ժամանակը չէ, որ ՀՀ քաղաքացին գոնե իր երկրում որևէ առավելություն ունենա և այստեղ էլ չնվաստացվի, ինչպես շատ այլ երկրներում, որտեղ գնահատում են իրենց քաղաքացուն և փորձում փոքր ինչ ավելի հարմարավետ դարձնել նրա վերադարձը հայրենիք:
Ինչպես ասում են՝ «вопрос на засыпку». ե՞րբ վերջապես ՀՀ քաղաքացիները կունենան առավելություն իրենց իսկ երկրում, ե՞րբ կառանձնացվի հատուկ հատված ՀՀ քաղաքացիների անձնագրերի ստուգման համար։ Ի վերջո, վայրէջք կատարելով քո իսկ երկրում, դու չես ցանկանում զգալ քեզ նվաստացված, ժամերով հերթ կանգնել։ Արդյո՞ք հնարավոր չէ առանձնացնել անձնագրային հատվածը ՀՀ քաղաքացիների համար, ինչպես բոլոր քաղաքակիրթ երկրներում է․․․
Մարիաննա Արամյան