Բանակցություններում առաջընթացի մասին ամերիկյան կողմն է խոսել, և կարծում եմ, որ պետք է այդ մասին հարցերն ամերիկյան կողմին ուղղեք։ Այդ մասին այսօր «Հաղթանակի» զբոսայգում լրագրողների հետ զրույցում ասաց ԱԽ քարտուղար Արմեն Գրիգորյանը՝ անդրադառնալով Հայաստանի և Ադրբեջանի ԱԳ նախարարների հանդիպմանը հաջորդած հայտարարություններին՝ ԱՄՆ պետքարտուղարի կողմից։
Նրա խոսքով՝ հայկական կողմն արդեն հայտարարել է, որ կան տարաձայնություններ, որոնք շտկելու ուղղությամբ քայլեր են արվում։
«Ադրբեջանցիները, բնականաբար, պետք է դուրս գան ՀՀ սուվերեն տարածքից։ Դա պարտադիր է, և պայմանագրի ստորագրումը հնարավոր է այդ պայմանում։ Ինչ վերաբերում է միջազգային երաշխավորի ինստիտուտին, ապա բանակցություններն ընթանում են, եթե լուծում գտնենք, ապա առաջ կշարժվենք, բայց այս պահին վերջնական լուծում չկա»,- նշեց նա։
Հարցին, թե ինքն ավելի շատ ո՞ր տաբերակին է հակված՝ արևմտյա՞ն, թե՞ ռուսական վեկտորի ներքո պետք է ստորագրվի փաստաթուղթը, Արմեն Գրիգորյանը պատասխանեց՝ այս պահին որևէ ձև որոշված չէ, որտեղ հնարավոր եղավ վերջնական արդյունքի հասնելու, այնտեղ էլ կստորագրվի։
Մեկ այլ հարցի, թե ինչպե՞ս է ինքը վերաբերում հանգամանքին, որ Թուրքիան որոշումներ է ընդունում, հայտարարում, օրինակ, որ «Նեմեսիսին» նվիրված արձանը պետք է Հայաստանը ապամոնտաժի, ԱԽ քարտուղարը պատասխանեց.
«Հայ-թուրքական հարաբերությունների կարգավորման հարցում մենք շարունակում ենք մնալ նույն կարծիքին, որ հարաբերությունները պետք է կարգավորվեն՝ առանց նախապայմանների»,- նշեց նա։
Իսկ արձանը կքանդվի՞. Գրիգորյանը հարցին չպատասխանեց՝ ասելով, որ ՏԻՄ դաշտում է հարցի լուծումը։
Մանրամասները՝ տեսանյութում։