Անցած շաբաթվա ընթացքում Արցախում տեղի ունեցան երկու ուշագրավ իրադարձություններ, որոնք առաջիկա ամիսների ու տարիների ընթացքում ամբողջովին փոխելու են ԼՂՀ ներքաղաքական ստատուս-քվոն: Նոյեմբերի 3-ին Արցախի խորհրդարանը երկրորդ ընթերցմամբ ընդունեց Սահմանադրության փոփոխությունների նախագիծը։
Ենթադրվում է, որ Արցախում սահմանադրական հանրաքվեն տեղի կունենա եկող տարվա փետրվար-մարտ ամիսներին։ Նոր Սահմանադրությամբ՝ Արցախում հետ են վերադառնալու կիսանախագահական համակարգին: Հանրաքվեից հետո՝ 2023-ի վերջին, տեղի կունենան խորհրդարանական, իսկ 2024-ին՝ նախագահական ընտրություններ:
Արդեն իսկ ուրվագծվում է այն առաջնորդը, ում գլխավորությամբ Արցախում տեղի են ունենալու քաղաքական- ինստիտուցիոնալ փոփոխությունները: Նոյեմբերի 4-ին մեծահարուստ Ռուբեն Վարդանյանը նշանակվել է պետնախարարի պաշտոնում, ընդ որում՝ լիազորությունների այնպիսի ծավալով, որ շուտով նախագահ Արայիկ Հարությունյանը հայտնվելու է նրա ստվերում:
Ինչքանո՞վ են այս իրադարձությունները կապված միայն ներքաղաքական համատեքստի հետ և արդյո՞ք Արցախի ներքաղաքական խմորումները կապված չեն նաև Արցախի շուրջ տեղի ունեցող արտաքին քաղաքական զարգացումների հետ, մանավանդ, որ Վարդանյանի համակարգման տակ է անցել նաև ԱԳՆ-ն՝ ցույց կտա ժամանակը:
Իսկ առայժմ կարող ենք փաստել, որ Արցախը հաղթահարում է իշխանության հետպատերազմյան ճգնաժամը:
Վահրամ Բագրատյան