Քահանաներն ու միանձնուհիները պոռնոգրաֆիա են դիտում համացանցում, ինչպես բոլորը, այս շաբաթ հռոմեական կաթոլիկ եկեղեցու սկսնակ ծառայողներին ասել է Հռոմի Ֆրանցիսկոս պապը։
«Սա արատ է, որը շատ մարդիկ ունեն, շատ աշխարհիկ տղամարդիկ, շատ աշխարհիկ կանայք, ինչպես նաեւ քահանաներ ու միանձնուհիներ: Սատանան կանգնում է նրանց ճանապարհին»,- Պապին մեջբերում է European Times-ը:
«Եվ ես խոսում եմ ոչ միայն հանցավոր պոռնոգրաֆիայի մասին, ինչպիսին այն է, որը կապված է երեխաների նկատմամբ դաժան վերաբերմունքի հետ: Այլ պոռնոգրաֆիան, որը մի քիչ «նորմալ» է համարվում։ Սիրելի եղբայրներ, զգույշ եղեք այս հարցում»,- նախազգուշացրել է նա սեմինարիստներին Հռոմում կայացած հանդիպման ժամանակ:
Նրանցից մեկը Հռոմի պապին հարցրել է, թե արդյոք հավատացյալները պետք է օգտագործեն ժամանակակից աշխարհի տեխնոլոգիաները, օրինակ՝ բջջային հեռախոսներ։ «Դուք պետք է օգտագործեք դրանք, դուք պետք է օգտագործեք դրանք որպես օգնություն, որպեսզի հաղորդակցվեք. դա նորմալ է»,- ասել է Պապը:
«Կա եւս մեկ բան, որը դուք լավ գիտեք՝ թվային պոռնոգրաֆիա»,- ասել է նա: «Մաքուր սիրտը, որն ամեն օր ընդունում է Հիսուսին, չի կարող ընդունել այդ պոռնոգրաֆիկ տեղեկատվությունը: Եվ եթե դուք կարող եք հեռացնել այն ձեր բջջային հեռախոսից, հեռացրեք այն»: