Hraparak.am-ը գրում է․
«Մենք ավելի վաղ գրեցինք, որ էշով Նիկոլ Փաշինյանի ետևից Իջևանից Երևան ժամանած դաշնակցական Սևադա Ղուկասյանը երեկ գիշեր երկու ամսով կալանավորվել է` սուտ մատնության մեղադրանքով: Դեպքի մանրամասները պարզելու նպատակով դիմեցինք Սևադա Ղուկասյանի պաշտպան Սերգեյ Հարությունյանին:
Փաստաբանի խոսքով` Սևադայի դեմ գործ է հարուցվել, քանի որ ըստ իրավապահների` Ղուկասյանը սուտ մատնություն է տվել ոստիկանների դեմ:
«Ակցիաներից մեկի ժամանակ Սևադան ոստիկաններից մեկի կողմից բռնության է ենթարկվել, կոտրել էին ատամը, դրա վերաբերյալ նա ոստիկանությունում հաղորդում էր ներկայացրել, թե իրեն բռնության են ենթարկել, ի դեպ, այդ ամենին արձագանքել էր նաև ՄԻՊ-ը` հենց դեպքի վայրից: ՄԻՊ-ի աշխատակիցն անգամ խորհուրդ էր տվել լինել ավելի մեղմ: Հիմա Սևադային կալանավորելու որոշում է կայացվել, քանի որ համացանցում ինչ-որ ձայնագրություն է տարածվել, թե իբրև Սևադա Ղուկասյանն ինչ-որ մեկի հետ զրուցում է և իբր թե ասում է`ատամս կոտրվել է, ձեռքիս է, ընդ որում բավականին կիսատ է ձայնագրությունը, չգիտենք, թե ձայնագրությունն ինչպես, ինչ ճանապարհով է արվել և ինչ ճանապարհով է հայտնվել համացանցում: Նա խոսում է իր ընկերոջ հետ, անգամ պարզ չէ, թե ովքեր են խոսում, կամ ձայնագրությունը մոնտաժվա՞ծ է, թե՞ ոչ, և հենս սրա հիման վրա էլ կեսգիշերից հետո նրան ձերբակալում են»,- նշում է նա:
Փաստաբանի խոսքով` Հայաստանը դառնում է ոստիկանապետություն, իսկ ահա մեզանում գործում են երկակի ստանդարտներ «Մենք լրիվ այլ իրականությունների մեջ ենք ապրում, մի քանի օր առաջ մենք ականատես եղանք, թե ինչ աստիճանի բռնություն են գործադրում ակցիա իրականացնող քաղաքացիների նկատմամբ ոստիկաններն, ընդհուպ կարելի է սա դիտարկել նաև որպես սպանության փորձ, սակայն հիմա ԱԱԾ աշխատակիցների և քննիչների համար զարմանալի է, որ կարող է ինչ-որ մի ոստիկան ցուցարարի ատամը կոտրել», - նշում է մեր զրուցակիցը»: