Գիշերը կրակել են Սյունիքի սահմանամերձ գյուղերի ուղղությամբ․ բնակիչներն անհանգիստ են

Երկօրյա դադարից հետո՝ անցած գիշեր ադրբեջանական դիրքերից նորից կրակել են  Սյունիքի մարզի Խնածախ գյուղի ուղղությամբ։ Գյուղի բնակիչը MediaHub-ին պատմեց, որ ուշ գիշերին և լուսադեմին հրադադարի ռեժիմը խախտվել է 2 անգամ։

«Իհարկե՛ գյուղի վրա են կրակել, հո իրենց ուղղությամբ չե՞ն կրակելու։ Անկանոն կրակ են բացել, իրենց նպատակը վախի մթնոլորտ ստեղծելն է, կրակել են այն ժամին, երբ բոլորս քնած ենք եղել։ Օդ չեն կրակել, մենք զգում ենք, որ փամփուշտներն անցնում են տների վրայով։ Նախորդ օրերի համեմատ, այս անգամ կրակահերթը կարճ է տևել»,-ասաց մեր զրուցակիցը։ 

Նախորդ 2 օրերին ադրբեջանական զինուժը պահպանել է հրադադարի պահպանման ռեժիմը։ Այն բանից հետո, երբ փամփուշտի գնդակը հայտնվել է գյուղի վարչական ղեկավարի տանը և ջարդել լուսամուտը, մյուս դեպքով՝ հարևան Խոզնավարի Պետրոսյանների տան տանիքին, Սյունիքի սահմանամերձ բնակավայրերում անհանգստություն կա։ 

«Դե, մարդիկ մտածում են, որ փոքր տրամաչափով եթե կրակում են, ու իրենց պատասխանող չկա, բան ասող չկա, ապա կարող են նաև խոշոր զինատեսակներով կրակել, մանավանդ, որ իրենց կողմից մեղադրում են մեզ, թե իբր մենք ենք խախտում հրադադարը։ Չգիտեմ, բայց ամեն կրակոցից հետո հասկանում ենք, որ իրենց հետ հարևանություն հնարավոր չէ անել»,- հավելեց մեր զրուցակիցը։ 

Խնածախն ադրբեջանական դիրքերին ամենամոտ գտնվող գյուղերից է, մոտ 330 մետր հեռավորության վրա։ Հայկական ու ադրբեջանական դիրքերը և դրոշները երևում են անգամ տներից։ Գրեթե նույն վիճակն է Խոզնավարում։

Բնակիչը MediaHub-ին փոխանցեց, որ հրադադարի պարբերական դարձած խախտումների նպատակը՝ հոգեբանորեն գյուղերի բնակիչներին ճնշելն է։

«Լուսաբացին իրենց կրակոցներից եմ վեր կացել, մեզ ահաբեկում են, հանգիստ չունենք։ Իրենց նպատակը մեզ վախի մթնոլորտում պահելն է, ուզում են հոգեբանորեն կոտրվենք, հանձնվենք։ Բայց մեր տղերքի ցավը տանեմ, որ դիրքերում են՝ հանգիստ ենք»,-եզրափակեց նա։ 

Նշենք, որ ՀՀ պաշտպանության նախարարությունը Ադրբեջանի կողմից հրադադարի պահպանման ռեժիմը խախտելու վերաբերյալ դեռևս հաղորդագրություն չի տարածել։

Հունան Թադևոսյան