Քիմ Քարդաշյանն այցելել է Կալիֆորնիայի Քրեսենթ Սիթի քաղաքում գտնվող «Պելիկան-Բեյ» պետական բանտ։ Այս մասին հայտնում է TMZ-ը։
Ենթադրվում է, որ հեռուստաաստղը ՔԿՀ է այցելել վավերագրական ֆիլմի նկարահանումների շրջանակներում, քանի որ նրա հետ բանտում են եղել դերասան Թոբի Մագուայրը, պրոդյուսեր Սքոթ Բուդնիկը և տեսախցիկներով նկարահանող խումբը։
Քիմ Քարդաշյանը բանտում հանդիպել է մեկուսարանում գտնվող բանտարկյալների հետ՝ մանրամասն քննարկելու, թե ինչպես է նման պատիժն ազդում նրանց հոգեկան առողջության վրա։
Քիմ Քարդաշյանը մի քանի տարի է, ինչ հանդես է գալիս ԱՄՆ ուղղիչ համակարգի բարեփոխման օգտին։ 2018 թվականին նա Սպիտակ տանը հանդիպել է Միացյալ Նահանգների 45-րդ նախագահ Դոնալդ Թրամփին՝ խնդրելով նրան ներում շնորհել 63-ամյա Էլիս Մարի Ջոնսոնին, ով ցմահ ազատազրկման էր դատապարտվել թմրանյութերի ապօրինի շրջանառության համար։ Ավելի ուշ նրա խնդրանքը բավարարվել էր։