MediaHub.am-ն իր հետևորդների ուշադրությանն է ներկայացնում Հայաստանի յուրօրինակ տեսարժան վայրերը, որտեղ կարելի է այցելել 2022 թ-ի ամռանը: Շարքի եռեսուներորդ տեսարժան վայրը Քառասնից Մանկանց վանքն է։
Քառասնից Մանկանց վանքը գտնվում է Դսեղ համայնքի հյուսիսարևմտյան մասում, Դեբեդի կիրճի ստորին հարթակի վրա, «Տախտեր» կոչվող հին բնակավայրի տարածքում: Սրբավայր կարելի է այցելել միայն ոտքով` Դսեղից դեպի Դեբեդի կիրճ տանող քարքարոտ ճանապարհով կամ Ձորագետ համայնքից` բարձրանալով դեպի Դսեղ:
Համալիրը բաղկացած է եկեղեցուց, ժամատնից, կացարաններից, օժանդակ շինություններից, գերեզմանոցից և խաչքարերից: Մեզ է հասել կիսավեր վիճակում: XIII դարի կառույց է: Հուշարձանը կառուցված է ֆելզիտե վարդագույն նրբերանգ սրբատաշ քարերով: Որմնամույթերը բազալտից են: Հարավային և արևելյան կողմերում կան ուշագրավ քանդակներով խաչքարեր: Պատերը հարուստ են արձանագրությունններով, խաչանախշերով ու վիմագրերով:
ՀԵՏԱՔՐՔԻՐ ՓԱՍՏ ՔԱՌԱՍՆԻՑ ՄԱՆԿԱՆՑ ՎԱՆՔԻ ՄԱՍԻՆ
Վանքը անվանվել է ի հիշատակ 40 հայ մանուկների, ում դաժանորեն սպանել էին հավատքին անդավաճան մնալու պատճառով, իսկ մասունքները այրել և նետել էին գետը: Քառասուն երեխաները դասվել են Սրբերի դասին:
