Ուրբաթ՝ հուլիսի 29-ին, ուկրաինական հացահատիկով առաջին նավը կարող է լքել Ուկրաինայի նավահանգիստը, հայտարարել է ՄԱԿ-ի գլխավոր քարտուղարի մարդասիրական հարցերով տեղակալ Մարտին Գրիֆիթսը։ Ճեպազրույցը հեռարձակվել է կազմակերպության կայքում, փոխանցում է Lenta.ru-ն։
«Մենք հուսով ենք և նախատեսում ենք, որ առաջին նավը՝ ուկրաինական հացահատիկով, կարող է մեկնել մոտ օրերս։ Հուսով եմ, որ դա տեղի կունենա վաղը»,- ասել է նա։
Բացի դրանից, արտահանման գործարքի շրջանակում երկրից կտեղափոխվեն նաև պարարտանյութեր։ Գրիֆիթսի խոսքով, սկզբում կողմերը կենտրոնացել են հացահատիկի արտահանման խնդրի վրա, սակայն բանակցությունների վերջին օրերին օրակարգում ներառվել են նաև պարարտանյութերը։
Հուլիսի 27-ին Ստամբուլում տեղի ունեցավ ուկրաինական նավահանգիստներից հացահատիկի անվտանգ արտահանման Համատեղ կոորդինացիոն կենտրոնի բացման արարողությունը։ Թուրքիայի պաշտպանության նախարար Հուլուսի Աքարը դիտորդական առաքելության մասնակիցներին ուղղված ուղերձում հույս է հայտնել, որ կենտրոնի աշխատանքը կվերացնի համաշխարհային պարենային ճգնաժամը, իսկ հացահատիկի անխափան արտահանումը կնվազեցնի շուկայում գները։
Կենտրոնը սկսել է աշխատանքը հուլիսի 22-ին Սեև ծովով ուկրաինական հացահատիկի արտահանման մասին համաձայնագրի շրջանակներում։