ՀՀ կառավարության 2022 թվականի մայիսի 26-ի նիստում, Նիկոլ Փաշինյանը հիշեց, որ եթե պետական գանձարանից փողը տանում եւ աննպատակ են օգտագործում, դա վատնում է: Դրանից չորս օր անց, նույն Նիկոլ Փաշինյանը մի վատնողի ու իր պարտականությունների մեջ թերացողի՝ Դավիթ Համբարյանին, նշանակել է արտակարգ իրավիճակների փոխնախարար: Մինչ մայիսի 30-ը, արտակարգ իրավիճակների նախարար Արմեն Փամբուխչյանը ուներ երկու տեղակալ: Արա Նազարյան՝ որին նշանակել են հանրապետականները, վերանշանակել թավշյաները եւ Արտյուշա Գրիգորյան, որին նշանակել են թավշյաները:
Նոր նշանակված փոխնախարար Դավիթ Համբարյանը մինչ այս նշանակումը Երեւանի քաղաքապետարանի աշխատակազմի քարտուղարն էր: Հայկ Մարությանն էր նրան այս պաշտոնում նշանակել 2020 թվականի սեպտեմբերին: Ընդամենը մեկ ամիս առաջ՝ 2022-ի մայիսի 4-ին, Երեւանի քաղաքապետ Հրաչյա Սարգսյանը Դավիթ Համբարյանին խիստ նկատողություն էր տվել մարտ, ապրիլ եւ մայիս ամիսներին ծառայողական պարտականություններն անհարգելի պատճառով չկատարելու՝ առանց հարգելի պատճառի գործակարգավարական 9 խորհրդակցության չմասնակցելու համար:
Դավիթ Համբարյանը Հայկ Մարությանի կադրն էր, գուցե դա է պատճառը, որ Մարությանին հաջորդած Հրաչյա Սարգսյանի հետ խնդիրներ է ունեցել: Բայց նախընտրել է աշխատավարձ ստանալ ու չաշխատել, այսինքն, Երեւանի գանձարանից փող տանել եւ արժեք չստեղծել: Սա դասական վատնում է: Թե ինչու Հրաչյա Սարգսյանը վատնողին չի հեռացրել աշխատանքից եւ բավարարվել է խիստ նկատողությամբ, իր խղճին, բայց որ Նիկոլ Փաշինյանը նախընտրել է վատ աշխատողին, վատնողին բարձր պաշտոն տալ, արդեն ողբերգություն է: Երաշխիք չկա, որ երեւանցիների վճարած հարկերից աշխատավարձ ստացած եւ չաշխատած մեկը, հոգատար կլինի ողջ Հայաստանի քաղաքացիների վճարած հարկերի հանդեպ:
Արեգ Մարգարյան