Որեւէ փաստաթուղթ չի ստորագրվել եւ չի պատրաստվում ստորագրման: Սա տեղեկատվական դիվերսիա է՝ ուղղորդված արտաքին ոչ բարեկամական ուժերի կողմից՝ երկրի դիմադրողականությունը կոտրելու համար։ Այդ մասին հայտարարել է ՀՀ վարչապետ Նիկոլ Փաշինյանը:

Ադրբեջանը լայնածավալ պատերազմ է սկսել Հայաստանի դեմ, կան բազմաթիվ զոհեր, վիրավորներ, թիրախավորվում են հայկական քաղաքներ և գյուղեր, իսկ Փաշինյանն ԱԺ-ում հայտարարում է, որ ինչ-որ փաստաթուղթ են պատրաստվում ստորագրել:

ՀՀ քաղաքացիները դուրս են գալիս փողոցներ, հանրության շրջանում խուճապային տրամադրություններ են տարածվում՝ ՀՀ քաղաքացիները սպասում են նոր նոյեմբերի 9-ի կապիտուլյացիոն փաստաթուղթ, ինչին հաջորդում է Փաշինյանի «մեղանչական» լայվը: Հանուն իշխանության պահպանման և տեսնելով համաժողովրդական հնարավոր ցասման վտանգը, ՔՊ-ականները միմյանց հերթ չտալով նշում են, որ որևէ փաստաթուղթ չի ստորագրվելու: Իհարկե, հայ ազգը չի հավատում Փաշինյանի և թիմի որևէ հայտարարությանը՝ Շուշին արդեն հանձնված էր, իսկ Փաշինյանը հայտարարում էր, թե Շուշիի համար մարտերը շարունակվում են:

ՔՊ-ականները հանուն իշխանության պահպանման սկսել են ռազմահայրենասիրական ստատուսներ գրել ֆեյսբուքում և հայտարարել, թե ոչ մի թիզ հող չեն զիջելու: Պարտվածների և խաղաղության ջատագովների կուսակցությունը հանուն իշխանության պահպանման և սարսափելով հայ ժողովրդի ինքնադատաստանից «ոչմիթիզական» է դարձել:

ՔՊ-ականների հեռացման պարագայում հայոց բանակը հաղթելու շանս կունենա: Քանի դեռ Երևանում իշխանության են ՔՊ-ականները, Ալիևը թիրախավորելու է անգամ Երևանը: ՀՀ-ում պետք է իշխանության գան ազգային, պետականամետ ուժեր, ովքեր կկարողանան կազմակերպել համաժողովրդական դիմադրություն ադրբեջանական ագրեսիային, կվերականգնեն հայոց բանակի նախկին մարտունակությունն ու երկրորդ շանսը կտան Արցախին:

Վահրամ Բագրատյան