Կարմրուկի վիրուսը երբեք չի հեռանում օրգանիզմից։ Այդ մասին այսօր հրավիրված ասուլիսի ընթացքում ասաց ԱՆ հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ, իմունականխարգելման ազգային ծրագրի ղեկավար Գայանե Սահակյանը։
Նրա խոսքով՝ եթե նպաստող հանգամանքներ են առաջանում, վիրուսը կարող է նորից ակտիվանալ։
«Եթե երեխան պատվաստվել է տարբեր հիվանդությունների դեմ կամ հիվանդացել է տարբեր հիվանդություններով, իր մոտ առաջացել է իմուն հիշողություն, իսկ կարմրուկի դեպքում այդ հիշողությունը չի գործում»,- նշեց նա։
Ըստ մասնագետի, այս ընթացքում ծնողները պետք է ուշադիր լինեն՝ երեխաների հանրային վայրեր տանելիս։
«Վարակն առնվազն յոթ օր է տևում, բայց կարող է հասնել 21 օրվա։ Իսկ պատվաստված անձանց մոտ թեթև է անցնում հիվանդությունը։ Եթե մարդը պատվաստված չէ, ապա վարակը, հատկապես մեծահասակների մոտ, ավելի ծանր է անցնում։ Ընդհանրապես, վարակվածների մեկ երրորդը մեծահասակներ են»,- նշեց մասնագետը։
Գայանե Սահակյանը նաև նշեց, որ մեկ դեղաչափով պատվաստվածները քիչ խոցելի են.
«18 տարեկաններից բարձր մարդկանց համար մեկ դեղաչափը բավարար է, իսկ մինչև այդ տարիքը մարդիկ պետք է երկու դեղաչափ ստանան, որպեսզի լիարժեք պաշտպանված լինեն»,- ասաց Գայանե Սահակյանը։